1679/2022-2023 

Aizawl 23rd August 2022: Vawiin khan State Institute of Rural Development & Panchayati Raj (SIRD&PR), Mizoram buatsaihin District hrang hranga SIRD&PR hnuaia Master Trainer-te tan ni 4 (23 –26.8.2022) chhung awh tur “Training of Master Trainers on Localization of Sustainable Development Goals” chu SIRD&PR, Durtlang Leitan-ah a hawnna neih a ni a. Pu David Lalthantluanga, Secretary, Local Administration Department, Govt. of Mizoram chuan khuallian niin he training hi a hawng a ni.

Training hawnna Pu Lalhmunsanga Hnamte, Director, SIRD&PR kaihhruaiah hian, Pu David Lalthantluanga chuan training pawimawh tak mai an nei thei tur chu lawmawm a tih thu sawiin, Kum 2019 khan United Nations General Assembly chuan kan Khawvel thang zelah nakin huna kan tu leh fate tana chenna tlak a nih theih nan hmasawnna  kan kalpui ruala kan tih tur leh kalpui tur pawimawh tak tak Goal 17 lai a duang chhuak a,  chung goal hrang hrang te chu kum 2030-ah chuan tihhlawhtlin tura ruahman a ni a, ram hrang hrangin a kalpui mek a, kan ramah pawh kalpui mek a ni a, hemi  tihlawhtling tur hian vawiina lo kal khawmte hi a zirtir chhawng leh turte in nih avangin in  pawimawh em em a ni, a ti.

LAD Secretary chuan Ministry of Panchayati Raj (MoPR) hnuaia Rashtriya Gram Swaraj Abhiyan (RGSA) Scheme kalpui mekah hian kan tualchhung roreltu, Village Council-te an theihna leh thiamna tihpun (Capacity Building) hi a ngai pawimawh em em a,  kan VC te hi an mahnia hmasawnna hna thawk thei tura kan chher a ngai a. SDG Goal 17- te tihlawhtling tur chuan tualchhung roreltu, VC te hi an pawimawh a, chung VC te zirtirna  petu tur chu in nih avangin mawhphurhna sang tak in nei a ni, a ti a. Danglamna thlentir theitu in ni tih in inhriat a ngai a, in zirtir VC te pawh National award dawng thei tura inbuatsaih a, hma in lak a pawimawh dawn a ni, Khuallian chuan a ti bawk.

Khuallian chuan tualchhung roreltu, VC-te an theihna leh hriatna kan tihpunsak tawh chuan hmalakna tur an hriain, hmasawnna kawng an zawh tawh zawk thin a ni tih hriain, thahnem ngai tak leh hlawk taka training tura kalkhawmte chahin, Training hi a hawng a ni.

Training hawnna hunah hian Dr. Margaret Lalbiakthangi, Course Director/ Senior Core Faculty, SIRD&PR chuan training neih dan tur tlangpui leh an zir turte sawina a nei a, Dr. MS Dawngliani, Course Director/Associate Professor, SIRD&PR chuan lawmthu sawiin training hawnna hun hi a khar a ni.

He Training-ah hian Mizoram District hrang hrang atangin Master Trainer mi 55 kalkhawmin, Group 2-ah thenin training hi kalpui a ni.