3350/2022-2023

Aizawl 25th January 2023: Vawiin khan ni sawmthum chhung awh tur (25th January – 25th February, 2023) “Training of Social Audit Resource Persons” chu SIRD&PR Conference Hall - I, Durtlang Leitan-ah a hawnna neih a ni a, Pu Lalhmunsanga Hnamte, Director, SIRD&PR chuan he training hi a hawng a ni.

Training hawnna Pu Lalhmachhuana, Director, Social Audit Unit (SAU) kaihhruaiah hian Pu Lalhmunsanga Hnamte chuan hawnna thu sawiin, training nei tura lo kalkhawmte chu Sorkar Scheme leh Programme hrang hrangte endiktu tur an nih avangin training ni 30 chhung an neih tur chu uluk tak leh thahnem ngai taka nei tura sawmin, Certificate Course a nih angin Training zawhah Exam/Evaluation neih a ni dawn a, Certificate dawng thei ngei tura tha taka training tur District hrang hrang atanga rawn kal Resource Person-te chu a chah a ni.

SIRD&PR Director chuan Social Audit hi thil thar ni lo mahse, mipuiin Sorkar Scheme hmanga hnathawhte an endikna atana pawimawh tak Gram Sabha (Vantlang Rorel Inkhawm) kan ngai pawimawh tawk lo thin a, ngai pawimawh zual tura kan inzirtir a pawimawh hle a ni, a ti a. Tualchhung atanga hmasawnna hnathawh hi Sorkar Laipui hian a ngai pawimawh em em a, chumi atana mi pawimawh in ni a, mipuiin sorkar hmalakna hrang hrangte an Audit (endik) theih nana hmalatu tur in nih avangin in mawhphurhna a sang a, tihsual leh tih dik loh in neih avangin harsatna thleng thei a nih avangin in fimkhur a, tihsual nei lo tura uluk taka hna in thawh a ngai dawn a ni, tiin, kan ram, kan district leh mipuite hmasawnna tur atana uluk tak leh hlawk taka training nei tura duhsakna hlanin, he training hi a hawng a ni.

Training hawnna hunah hian Dr. Khuangthansanga Pakhuangte, Associate Professor/Course Director-in training chhunga hun hman dan tur tlangpui leh hriattur pawimawh hrang hrang te a sawi a. Pu Shasidhar, Training Manager, Centre for Social Audit, NIRDPR, Hyderabad leh Pu Debasis Bera, Lead Course Coordinator, Kolkata, West Bengal-ten thu an sawi bawk.

District hrang hrang atanga Social Audit Resource Person mi 30 kalkhawmte hi Lead Course Coordinator, SIRD&PR Faculty-te, District Resource Person, SAU-te leh mithiam sawmbikte’n zirtirna an pe dawn a ni.