Vawiin khan Lengpui-a Krishi Vigyan Kendra (KVK) huaihawtin Mamit District huam chhunga ramri hungin a khawih buai loneitute tan training buatsaih a ni a. Training hawnna inkhawm hi Agriculture Director Pu O.P.Singh-in a kaihruai a, Minister of State for AH&Vety Pu N.K.Chakma chu Khuallian a ni.

 

 

Khuallian chuan thu sawiin Mizoram leh Bangladesh inkar ramri hung a nih tak avangin helai hmuna cheng thin, a bik takin Chakma chhungkua tam takte chu an in leh lo rauhsan a ngai ta a, an awmna hmun tharah eizawnna ngelnghet zawk an nei a, hmasawnna tlo zawk an nei theih nan hetiang training hi buatsaih a ni, a ti a. Hmun thar khaw tharah inbengbelh tur an nih avangin sorkarin anmahni chu lonei, ranvulh leh eizawnna kawng hrang hrangah buatsaih chho zel a tum thu a sawi. Minister chuan hetiang harsatna nei chhungkuate tana training changtlung tak KVK-in a buatsaih thei chu a lawmthu a sawi bawk.

Training kalphung tur tlangpui Dr.Hmarkunga, Dy. Director, AH&Vety chuan a sawi a. Training te tana hriattur leh thil pawimawh tangkai tak tak a hrilhfiah a ni.

Mamit District pum huap KVK, Lengpui hi Indian Council for Agricultural Research hnuaia mi niin 31 May, 2008 khan din tan a ni a, Programme Coordinator chu Pu R.K.Nithanga a ni. Lengpui-a KVK bakah hian Mizoram District dang zawng zawng atan KVK hi din a ni tawh a.  Champhai district tan Khawzawl-ah, Serchhip District tan N. Vanlaiphai-ah, Lunglei District tan Hnahthial-ah, Kolasib, Saiha leh Lawngtlai-ah te KVK changtlung tak an awm tawh a ni. Aizawl District tana KVK din erawh chu Selesih-a Central Agriculture University enkawlna hnuaiah dah a ni. KVK hmunah hian tunlai thiamna (technology) hmanga lo nei, huanthlai siam  leh ranvulh tute hmasawnna tur chi hrang hrang ngaihtuah sak a ni thin a ni.