Vawiin chawhnu khan Pu John Rotluangliana, Minister Transport Department hovin a office ah Meeting of Consultative Committee on Transport Department neih a ni a. He meeting ah hian Official Member Pu TT Zothansanga, Parliamentary Secretary; Pu Hrangtawna, IRTS, Commissioner & Secretary, Transport; Pu K. Sangthuama, MLA; Pu P.C. Zoram Sangliana, MLA; Pu John Siamkunga, MLA leh Transport department officer te  an tel kim hle.

Meeting kaihruaitu Pu John Rotluangliana chuan Transport Department hmalakna leh hmachhawpte leh pawimawhna sawiin Transport Department chu Mizoram tana Revenue sum lalut tam ber pawl department an niin License hrang hrang an pekna atangin mi tam tak tan eizawnna siam sak tu an nih thu a sawi a, chutih rualin mi tam tak nunna kawltu department an nih avanga fimkhur taka hna thawk tur an nih thu a sawi bawk. Mite thil tih saktu kan nih lai hian sorkar in a phal loh leh dan lo thilah theih miah loh tur leh bawhzui chi loh ah chuan mite beiseina siam sak lova, a theih loh thu sawitlang nghal mai thin turin member-te chu a hrilh a, Thupek hrang hrang hmuhte zawm chungchangah ram mipuite hmakhua thlirin state dangte tih dan zir phawt a that thu leh hmalak tak tak hmaa a chin chang lo zir chian a pawimawh thu a sawi bawk.

Pu Hrangtawna chuan Transport Department in a an hmalakna leh report pe in Transport Department hnathawh chu sumdawnna thil ni lovin ram leh mipuite tana thawktu sorkar department an nih thu a sawi a. Kum 2014 – 2015 chhung hian MST Bus te hi an tum ram thleng tur in trip 3186 tlanin passenger 48700 phurin km 1,61,595 tlan  ni a. Kum 2013 – 2014 ah Motor Vehicle resistered 1,37,287 niin 2014 – 2015 inkar ah chuan 14,261 registered a ni bawk,tichuan 31^st March, 2015 thlenga registered tawh chu 1,51,548 a ni. High Security Registration Plate (Motor Registration Plate)  hi  27^th April, 2012 ah Mizoram ram District pumpuiah hman tan a ni a. 30^th June, 2015 thlenga HSRP registered tawh zawng chu 1,09,799. Smart Card pawh 18^th May, 2012 ah hman tan niin 30^th June, 2015 thlenga Smart Card Driving License pekchhuah tawh chu 35,842 a nih thu a sawi. Heng bakah hian kawngpui leh highway ah te Road Safety a hma an lak dan te report a ni a. Serchhip, Kolasib leh Aizawl South (Melthum) a Bus Terminal sak meka hmalak dan te a report bawk.

Vawiin meeting ah hian sorkar in a phal loh  leh a khap te phurtu  lirthei Driving License leh Permit cancel anih tur thu te, Transport Directorate Building sak mek chungchang te, Motor Vehicle Taxes (Amendment) Bill 2015 a Tax rate thar te, Parking Fee District Hqrs. tina khawn chungchang te leh Bus a chuang khualzin accident tawk te tana accidental insurance claim ve theih dan tur chungchangte leh thil pawimawh tak tak rel ho a ni.