Vawiin khan Secretariat Conference Hall, New Secretariat Complex Khatla ah Transport Minister Pu John Rotluangliana kaihhruainain State Road Safety Council Meeting pawimawh tak neih a ni. Pu TT Zothansanga Parliamentary Secretary leh Dr. Franklin Laltinkhuma Secretary, Transport Department te bakah District hrang hranga Deputy Commissioner leh District Transport Officer-te he meeting-ah hian an tel a ni.

Road Safety-hi Central Sawrkarin a ngaih pawimawh em em laiin helamah duhaiin hmalakna a kal muan deuh thu sawiin Pu John Rotluangliana chuan lirthei pung zelah leh duh anga kawngte a zau loh hlawm avangin tih takzet a Road Safety hi kan ngaihpawimawh a tul takzet thu a sawi a. Supreme Court-in Road Safety Council din tura a tih avangin Mizoramah pawh December 20 khan din a nih thu leh Group of Minister Hill State Minister panga lai awmna Mizoramah pawh tun hnaiah din a nih tawh thu leh thei ang ang a he mi kawnga hma lak a nih tawh dan a sawi bawk.

Transport Minister chuan tunlai khawvelah natna hrang hrang awmin nitina AIDS leh Cancer natna ten nunna a suat thu hriat a ni thin, chutih laiin road accident- lirthei a vanga thihna leh chhiatna thleng pawh a hluar zelin accident chungchang hriat tur a awm reng thin avangin Road Safety hi ngaihpawimawh a tul thu leh nikum chhung khan road accident avangin Mizo te zingah mi 52 laiin nunna an chan thu a sawi bawk.

Disable vehicles (motor tlan thei tawhlo) kawng sira hnutchhiah te pawh a rang lama hnuhsawn thuai nise tih leh kawngsir ah leh pengthuamah te motor dah ching an la awm chu sawiho nghalin a tul dan ang a Police lamin seng hawi zel tura rel ho a nih bakah tunlaiin motor changkang tak tak khalha mipangai ni awm taka langte pawhin Traffic Rules leh Road Sign hre miahloin lirthei an khalh thin chu a him loh thu sawiin heti lam hawia in zirtirna uar lehzual a hmalak nise tiin rawtna hrang hrang siama relho nghal a ni.

Additional Secretary leh District hrang hrang a DC leh DTO ten an hmalakna hrang hrang leh an hmachhawp vawiin meeting-ah hian report ngaihthlak a ni a, Road Safety Week hi tun thla 28th January 2017 hian Mizoram pumpuiah hman tum a ni a chumi atana hmalakna tur hrang hrang te vawiin hian relho nghal a ni.