Bungraw phur chi Rel lian chuan a vawikhatna atan vawiin chawhnu dar 1:00 khan Bairabi a lo theng a, Transport Minister Pu John Rotluangliana’n a lo dawngsawng a. Rel rawn lut hi Transport Minister Pu John Rotluangliana, Parliamentary Pu TT Zothansanga leh Bialtu MLA Pu P.C. Zoram Sangliana te chuan vailutin Rel driver 2 te hi parthi an awrh tir a.  He Rel hian buhfai 2600 Metric-Ton a rawn phur thlengin heng te hi wagon 40 a phurh a ni.

Rel hmuahna inkhawm tawi neih ah Transport Minister chuan thusawiin Bairabi a Rel lian lo thleng chu Mizoram leh Hnam tan hmasawnna a nih thu leh Mizo mipuite tan sawinep theih a ni lo a, Mizoram tan mellung pawimawh tak chanchin chhinchiah tlak a ni a ti a. Railway lamin Rel lian thlen hun tura an sawi March 2016 chu a tirah awih mai a harsat thu leh a tak a thleng ang em tih ngaihtuahna ah a awm thu a sawi a. Mahse vawiinah a tak ngeia hmuh theihin a lo awm ta a. Railway lamin an sawi ang ngeiin an tan hun tur takah tanin an work schedule ang zela kala a hun takah an zo thei ta mai chu thawktute fakin lawmawm a tih thu a sawi.

Minister chuan Rel lut hmasa kha a duhkhawp awm loh thu leh India ram khawpui liante tlawhtu Rel lian in Mizoram a rawn tlawh takah chuan ram dangte nen pawh hmasawnna ah kan kal rual thei tawh ang tih sawiin Rel in bungrua a rawn phurh luh chu a phurh man a tlawm dawn a, a hralh chhuah lehna pawh a tlawm dawn avangin a chhawrtu chu mipui kan ni a, hei hi kan ram tan a tha dawn hle a a beisei thu a sawi bawk. Bairabi chu Rel lian thlenna tur a nih avangin Mizoram darthlalang a ni dawn a, hnam dang lo lut te chu rinawmna leh dikna nen lo dawngsawng tur leh Mizo zia dik tak nen lo hmachhawn turin a chah nghal a ni.

He hunah hian Pu TT Zothansanga Parliamentary Secretary pawhin Mizoram in Liveline pakhat, Silchar chauh kan neih thin chu Bairabi nen pahnih kan nei tawh dawn a, Mizo mipuite tan a ropuiin ni chhinchhiah tlak a nih thu a sawi. Pu P.C. Zoram Sangliana, Kolasib Bialtu MLA leh Kolasib DC Pu H. Lalengmawia te pawhin he hunah hian thu an sawi a, Railway Chief Administrative Officer Pu A.F. Garut pawhin Bairabi thleng rel kawng siam chu an zawh thawkhat thu leh Sairang thleng rel kawng siam chu 2019 ah zawh hman tum a nih thu a sawi.

He inkhawm tawite hi Dr. Franklin Laltinkhuma IAS, Special Secretary, Transport in a kaihruai a ni.