Vawiin khan Transport Minister Pu John Rotluangliana chuan Mizoram Transport Workers’ Association (MTWA) General Assembly vawi 25-na chu Transport Conference Hall, Chaltlangah a hmanpui.

Pu John Rotluangliana chuan Transport Workers-te an thawhrimna leh inpekna fakin midangte tana rawngbawlsaktu an nih hre renga, thahnemngai leh taima lehzuala an hnate rinawm taka thawk turin a fuih. Minister chuan Transport Department chu sorkar hnathawkte chauh awmna hmun a ni lova; bus, maxicab, taxi leh eizawn nana hman lirthei reng rengte huam vektu department an nih avangin enkawl uluk an ngai hle a ni, a ti. Mipui vahvelna public transport mumal, changtlung leh him zawk nei a, transport in hma a sawn zel theihna tura thawhpui atan Pu John Rotluangliana chuan Transport Workers-te a sawm a. An hnathawhnaah eirukna leh hlemhletna in hmun a chang tur a nilo, a ti bawk.

MTWA inkhawmpui hi an President Pu R.Lalrammawia, DD(STA) chuan kaihruaiin an General Secretary Pu C Lalthlengliana’n an pawl hmalakna tlangpui a tarlang a. An member boral ta te sunna leh pension thlahna hun an hmang. Chawhnu lamah rorel inkhawm an neih chhunzawm nghal a ni.

Mizoram Transport Workers’ Association-ah hian tun dinhmunah member 620 an awm mek a ni.