Vawiin khan Mizoram Transport Workers’ Association (MTWA) General Assembly vawi 27-na Transport Department Conference Hall-a neih chu Transport Minister Pu John Rotluangliana’n a hmanpui.

Khuallian Pu John Rotluangliana chuan Transport Department-a officer leh staff-te thawhrimnaah lawm thu a sawi a. Transport Department chu Department pawimawh ber pawl, revenue tam tak khawn khawmtu, mipuite’n an dawr tam pawl tak an nih avangin nasa zawka tan la tur te, hawihhawm chhuah leh zual tur leh tawngkam mawi hmang hram hram thin turin a fuih a. February ni 8, 2016 atang hian Vehicle Tax rate thar hman tan tur a nih thu sawiin, life-time tax (kum 15 chhung) atan motor man atanga zaa paruk (6%) zel lak tawh tur a ni ang, a ti. Silchar-ah Petrol Pump siam tum a nih thu leh Vairengte-ah Weighbridge siam tum a nih thu sawiin, Minister chuan Transport Department-in Consumer Pump a neih sate pawh revenue thawk chhuah turin hralh chhuah theihna hmun (retail outlet)-a let tura hma lak mek a ni, a ti bawk.

Transport Director Pu L.Biakthanga chuan kal khawmte lawmna thu a sawi a. Transport Minister hma laknaa bus thar pali (4) lei tum a nih thu te, kum kal ta chhunga Department-in cheng vaibelchhe 16 chuang a thawh chhuah thu te leh document fel lo avanga taxi permit 264 lai cancel a nih tawh thu te sawiin, ei rukna leh hlemhletna tel lova thawk zel turin thawktute a sawm a ni.

He General Assembly-ah hian MTWA member pension-a chhuak tate thlahna hun leh member thite sunna hun hman a ni a. Chawhnu lamah rorel leh hruaitu thlanna hun hman a ni bawk.