125/2023-2024

Aizawl, the 18th April, 2023: Union Minister of Road Transport & Highways Pu Nitin Gadkari kaihhruaia nimina India rama State leh Union Territory (UT) hrang hranga Transport Minister-te intawhkhawmna, New Delhi-a neihah Transport Minister Pu T.J. Lalnuntluanga chu telin Mizoram mamawh hrang hrangte a thlen.

He huna thu a sawinaah Transport Minister Pu T.J. Lalnuntluanga chuan Lirthei fit leh fit lo endikna tur Inspection & Certification Centre Hlimen, Aizawla sak mek a nih thu leh changtlung zawka thuam that a ngaih thu a sawi a; hei hi Union Minister chuan an lo enzui tur thu a hrilh nghal a. Hemi bakah hian Vehicle Scrapping Policy chungchang tarlangin, Mizoram ang sum leh pai dinhmun la hniam taka lirthei neitute'n a thar lei lehna tura harsatna an tawh theih dawn avangin, Vehicle Scrapping ti turte tana incentive/relief measure siam turin a ngen a; Union Minister chuan ngaihtuahzui an tum tur thuin a chhang bawk a ni.

Hemi bakah hian National Electric Bus Programme (NEBP) hnuaia electric bus kalpui dan tur programme Central-in a duang chu State-in tha a tih thu a sawi a. Mizoram ang tlangramah hmantlak a nih dawn leh dawn loh a zawhna chu Union Minister chuan a hmantlak tur thu leh a siamtu Company-te nen pawh hemi chungchangah hian meeting koh leh vat a nih tur thuin a chhang bawk a ni.

Pu T.J. Lalnuntluanga hian meeting neih zawh hian Union Minister of Road Transport & Highways Pu Nitin Gadkari chu hmu nghalin, Khankawn leh Kanan Veng, Champhai inkar kawng km 3.7 a thui, tuna NH-6 kawng siam mekin a huam chu double lane a siam sak turin a ngen a. Hemi bakah hian Myanmar nena insumdawntawnna hmun pawimawh tak, Zokhawthar Tiau luia Mizoram leh Myanmar inkalpawhna Lei siamna tur, cheng vaibelchhe 22.50 hu project proposal siam chu tihhlawhtlinsak ngei tura ngenin Zokhawthar thleng National Highway a puanna gazette copy a pe tel bawk a. Union Minister chuan a hlawhtlin theih nan hma a lo lak tur thu a hrilh bawk a ni.