Vawiin khan Sorkar laipui bultuma Tribal Girls’ Hostel sak tur lungphum phumna inkhawm chu Govt. KVM High School, Chhinga Vengah ah hman a ni a, Home Minister Pu R. Lalzirliana chu Khuallian a ni. Education Minister Pu Lalsawta chu Khualzahawm niin lungphum hi a phum bawk. He lungphum inkhawm hi Additional Chief Secretary Pi M.Sathiyavati-in a kaihruai a, Social Welfare Department leh Education Department-a Officer thenkhatte, North East Consultancy Firm (NECS) hotute leh Armed Veng leh Chhinga Veng Local Council hruaitute an tel a ni.

Khuallian Home Minister Pu R. Lalzirliana chuan KVM High School-in hmeichhe hostel tha tak an neih tur chu zirna tichangtlung zawk tura hman a nih a beisei thu a sawi a. Veng mipuite tan hmun hla zawka zirna tha zawk beiseia sum leh tha sen ngai lova mahni kawtchhuah ngeia zirna in tha an neih chu an hman tangkai thiam a beisei thu sawiin zirna chu an building that ang bawka a that ve zel theih nan, zirtirtute pawh tan la turin a fuih bawk.

Khualzahawm Pu Lalsawta chuan veng mipuite chuan Hostel thar tur chu an hlut thiam a beisei thu a sawi a. Mizoten zirna tha kan ngaih pawimawh mai bakah mi hmantlak kan siamchhuah hi tul takzet a ni, a ti bawk.

Metre 1106.23 bial-a lian tura duan Tribal Girls’ Hostel hi Sorkar laipui chuan tribal hmeichhiate dinhmun, a bik takin zirna kawnga dawmkan an nih theihnan a ruahman a ni a. Ministry of Tribal Affairs kaltlanga Mizoram Social Welfare Department hnuaia sak tur a duan a ni. A sak hna tak hi NECS hnenah hlan niin, Mizoram hmun hrang hranga Tribal Hostel pasarih sak nan hian Mizoram Sorkar chuan cheng nuai 1,873 a pechhuak tawh a ni. Hostel hi sak zawh a nih hunah School Education Department enkawl tura hlan a ni ang.

He inkhawmah hian NECS-a Chief Managing Director, Pu Robert Romawia Royte chuan Technical Report a pe a, School Education Deputy Director in lawmthusawina in a khar a ni.