Vawiin khan Former Legislators Association of Mizoram (FLAM) buatsaihin Assembly Annexe Conference Hall ah ‘Water Conservation’ tih thupui hmangin seminar neih a ni a. Public Health Engineering (PHE) Minister Pu Zodintluanga’n a hmanpui.

Pu Zodintluanga chuan Mizoram chhung hmun tam takah tuihna a kang nasa a, thingtlang khaw tam takah thalvaekchar lai pawha tuihna kang ngailo kan neih thinte kha tunah chuan a lo kang chat zawh tak avangin tuihna humhalh hi tihtur pawimawh leh buaipui tham a tling ta, a ti a. Lui leh kawr tui chawmtu tha nei khuate pawh an tuihnar a kang nasat avangin khua atanga kilometer 20 vel zeta hla atanga tui lak te a lo tul tawh a. Hei hi hriain PHE department chuan Central YMA nen thawhhona thuthlung ziakin Mizoram dung leh vangah tuihna humhalh pawimawhzia nasa taka zirtirna a kalpui a, tun dinhmunah he hmalakna hi hlawhtling viau nia a hriat thu a sawi a ni. PHE Minister chuan tui hnianghnar zawka mipui mimirin an dawn theihna tura department hmachhawp thenkhat a sawi lang a, SIPMIU kaltlanga scheme thar an buaipui mek Aizawl khawpui chhunga khelmual thenkhatah tanky lian tak siamin fur chhunga tui in tur thianghlim hnianghnar taka herhhaw theih tur dah tum a nih thu te, chak zawka tui semchhuah a nih theih nan khawpui chhunga tui semchhuahna distribution line thlak tura hmalak mek a nih dan leh a thawktu tur contractor thlan fel an nih tawh thu a tarlang a. Hei bakah hian mipuite’n hnianghnar taka tui an dawn theihna tur sawrkar hmathlir sawi langin kum reiloteah Asian Development Bank (ADB) sum hmanga Aizawl khawpui chhungah nitin darkar 24 tui sem theihna tur ruahmanna siam mek a nih thu te, sorkar laipui Ministry of Urban Development pawhin vaibelchhe 287.86 man technical approval a pek tawh thu Pu Zodintluanga chuan a sawi a ni.

FLAM President Pu KL Rochama pawhin lui tui leh lei hnuai tui te a kang chak em em a, tui lova awm theilo mihring kan pung chak bawk si a, Mizoram dinhmun en hian Water Conservation chungchang ngaihtuah ngun a ngai ta hle, a ti a. Kan tisa nunna a tan a lova kan awm theih hauhloh tui chungchang hi ngaih pawimawh berah neih a tul a, kan tuihna kang mekte theihtawp chhuaha humhalh leh a tihpun dan ngaituah a tul ta takzet a ni, a ti.

FLAM seminar hi an President Pu KL Rochama’n kaihruaiin PHE Executive Engineer Pu Lalrinzuala paper buatsaih zirho a ni a. Chawhnuah MJA kaihhruaiin Office Bearers thlanna hun an hmang a ni.