Champhai bul Tuipui khua a Tomato chingtu chhungkaw 11 te chuan kumin hian Tomato Quintal 1700 vel thar an in beisei a. Rural Development Department kal tlanga Integrated Watershed Management Project (IWMP) hnuaia Tuipui Lungreng Zau a Tomato chingtu chhungkaw 6 bikin Tomato Quintal 1000 vel thar an in beisei thu dawn a ni.

Nimin khan Champhai DC Pu Vanlalngaihsaka leh DRDA Project Director Pu CC. Lalchhuangkima te chuan IWMP hnuaia Lungreng Zau a chhungkaw 6 ten Tomato an chinna hmun leh he Zau panna kawng MGNREGA hmanga Km 1 chuang a thui kawnglaih chu an tlawh a. Khawchhak tlangdunga kut hnathawktute thawhrimna leh inpekna chu fakawm an tiin, kuthnathawktuten Zo-tlangsang a chin tur dik tak thlai chi an chin hunah chuan rim tak leh taima taka thawktute chuan an thawhrim rah anla seng ngei dawn a ni an ti.

Lungreng zau Tin 80 vel ram huamah hian chhungkaw 50 velin thlai chi hrang hrang Tomato, Serthlum, Sawhthing, Thingfanghma leh Bean an ching a, he zau a Tomato chingtu chhungkaw 6 zingah kumin hian chhungkaw mal Tomato kung 10000 chingtu leh quintal 400 chuang thar in beisei pawh an awm hlawm a ni.

Tuipui khua in Tomato an chin hi Delhi atanga a chi an chah, Arkaraksak leh Arkasamrat a ni a, Tomato rah hi a tui bakah a kawr a chhah vangin thla chanve (Ni 15) chhung dah anih pawha a tawih ve mai loh thu leh Tomato kung khatah hian Kg 19 vel rah thei a chhut anih bakah he Tomato chi hian thlai natna lar tak chi 3 (Leaf curve virus, Early blithe leh Bacterial yield) lakah a him theih bik thu dawn a ni bawk.

Nikum khan Tuipui Lungreng Zau a Tomato chingtuten kg 1 Rs 50/- a hralhin, Cheng Nuai 12 zet sum an tel a, kumin hian Tomato hralhna man (kg 1 Rs 30-40 velin a hralh)a tla hniam thung a. Tomato hi Aizawl, Lunglei leh khaw hrang hrangah hralh thinin, kumin hian Tomato a thar hmasa chu an seng tan tawh a, a seng runpui erawh October thla anih tur thu leh fur ruahtui tam luat vangin an thlai chinah harsatna an tawh deuh thu dawn a ni.

Champhai District-ah hian Hlawlting taka Grape chin anih bak ah Champhai a Israel Apple chin chhin chu an thang duangin a rah hun ngaihchan mek a ni a. Asparagus (Zema Thingthupui an tih) chu Zotlang sanga chin chi anih bakah International market-ah pawh hralh tla tak a ni tih hriat a ni bawk a. Kiwi pawh chhungkaw tam takin chingin an hlawhtlinpui mek bakah Sawhthing, Serthlum leh thlai chi hrang hrang pawh kuthnathawktuten an ching a. An thawhrah thlai tharchhuahte man man zawk a hralhna mumal tak a awm hunah chuan khawchhak tlangdung kut hnathawktuten an thawhrim rah sengin anla dinchhuah ngei beisei a ni.

Attachment

  • Loading attachment...