Cable TV digital pek chhuah tur chungchanga hmalakna thlirletin vawiin khan Pu Lalrinliana Fanai, Commissioner & Secretary, GAD hovin a Office Chamber-ah meeting neih a ni a. Sawrkar laipui thuchhuah anga Mizorama khaw 23 (Urban Areas) digitalise tura tan lak anih dan thlir ho a ni.

Tarlan tawh angin TV Digital a pek chhuah turah hian 31st December, 2015 khi tuna TV kan en mek Analog tihtawp hun tur ani a. Hemi ni atang hi chuan Set Top Box kaltlang chauhvin TV a en theih tawh dawn a, Aizawl a TV Operator te leh khaw thlan bik 22 a TV Operator zawng zawngte chuan hei hi an zawm vek a ngai a ni. Vawiina meeting-ah hian operator pahnih LPS leh Zonet te chuan thui tak hma an lak tawh thu an report a ni.

TV Digital-a lehlin thu hi Sorkar laipui thupek anih avangin hmun tina operator hemi Phase-III in a huam chhung amite chuan an zawm vek tur a ni a, zawm lote chu dan hmanga hrem theih an ni nghe nghe a ni.

TV Digitalised chungchang hi District tina DC ah Sorkar chuan hma la tura hrilh angin Additional D.C theuhte chu Nodal Officerrr ah ruatin tunah hian chak takin hna an kalpui bawk a ni.