Urban Development and Poverty Alleviation Department (UD&PA) Consultative Committee chu vawiin khan an Chairman Pu Zodintluanga, UD&PA Minister hovin a pisaah an thukhawm. Meeting-ah hian MLA pathum Pu Lalrinliana Sailo, Pu Lalruatkima leh Pu Chalrosanga te bakah Member Secretary Dr.C.Vanlalramsanga, UD&PA Secretary ni bawk; Pi Marli Vankung, Parliamentary Affairs Secretary leh official dangte an tel a ni. 

Pu Zodintluanga chuan Department kaihhnawih thulukna khirh leh pawimawh siam a ngaih chang apiangin  Consultative Committee member-ten uluk taka an ngaihtuahna sengin an finchhuah thin a, he meeting thutlukna hian Mizoram tan thil tha tam tak a thawk thei a ni, a ti. 

Vawiin meeting-ah hian property tax, AMC Councillors te hlawh leh lawmman dawn chungchang te, AMC account audit, Local Body Ombudsman chungchang te sawiho a nih bakah UD&PA leh SIPMIU in project leh scheme a kalpui mek inhrilhriatna hun hman a ni.  Sawrkar building ten property tax an pek thin leh Sawrkar lirtheite laka parking fee lak thin tih tawp tha an tih thu meeting ah hian an tarlang a. Accountant General leh Director, Local Fund Audit, Accounts and Treasuries in AMC a audit kawp thin chu tihtawp tha tiin Mizoram sawrkarin a ruat angin Director of Local Fund chauhin AMC hi audit tawh se tiin an rawt a. 14th Finance Commission chuan agency pakhat aia tamin sum hman dan audit kher a phut lo tih meeting-ah hian tarlan a ni. 

Local Council leh Village Council ten lungawilohna leh vuivaina an neih apiang an thlen theihna, Local Body Ombudsman chu The Mizoram (Establishment of Independent Local Body) Ombudsman Act, 2011 (Annexure-E) hmanga din a ni tawh a. Amaherawhchu, Ombudsman leh a puitu tur staff te post hi dan ang taka siam a la nih loh avangin Ombudsman hian SAD hnuaia Consultant post angin hlawh a la a. Committee chuan danin a sawi ang ngeia a rang lama post siam tha a ti a, sawrkarah bawhzui chhunzawm turin thu an dah a ni. 

UD&PA hian District Headquarters pathum - Lunglei, Champhai leh Kolasib-ah te District office a nei mek a, Mamit leh Serchhipah hawn thuai tum a ni bawk. Khawpui hmasawnna tur sawrkar scheme tam tak thawktu an nih avangin staff indaihlohna a nasa hle nia sawiin Consultative Committee-ah hian post 38 siam thar tura rawtna an thehlut a ni. Meeting-ah hian UD&PA hnuaia sawrkar laipui atanga scheme an thawh mek  -NULM, 10%GBS, Swachh Bharat Mission (Urban), AMRUT, HFA, Smart City, NLCPR/NEC leh State Sawrkar scheme - NLUP leh NEDP hnuaia hna an thawh dan bakah SIPMIU hnuaia hmalakna te UD&PA Director Pu Joseph H.Lalramsanga leh SIPMIU Program Director Pu Valbuanga ten an sawifiah a ni.