Union Minister of State For Consumer, Food And Public Distribution Pu C. R. Chaudhary chu zan khat riak turin vawiin khan Mizoram a lo thleng a. Chawhnu khan Food, Civil  & Consumer Affairs Minister Pu John Rotluangliana,  Parliamentary Secretary Pu TT Zothansanga, FCS&CA Department leh Food Corporation of India (FCI)  hotute nen State Guest House-ah an inkawm a ni. 

Union Minister of State chuan India Prime Minister in a Minister te hnena India hmarchhak state ten harsatna an tawh leh an hmalakna te an hriatpui theih nan thla tin tlawh thin tura a tih anga Mizoram lo kal a nih thu a sawi a. Mizoram a  Public Distribution System (PDS) kaltlanga buhfai leh hamthatna dangte sem a nih dan leh harsatna tawh te, FCI nena an hnathawh ho dan te leh, Central Ministry atanga hmachhawp hang hrangte hlenchhuak tura an thawh dan te a hriat duh thu a sawi a. Minister of State chuan PDS hnuaia buhfai sem a nih hian a dawngtu tur dik takin an dawn tur zat ngei a dawn theih nan Ration Card digitisation te, Aadhaar nena Ration Card thlunzawm te, Fair Price Shop-te computerise chu sorkar laipuiin a ngaihpawimawh thu a sawi a. National Food Security Act (NFSA) hnuaiah pawh Fair Price Shop-te computerise hi hmalakna pawimawh tak a nih thu a sawi a. Mizoram a Ration Card digitisation hna za a za zawh fel a ni chu lawmawm a tih thu a sawi bawk. 

Ration Card 2,65,247 chu digitize vek a ni tawh a. Mipuiin web portal (mizorampds.nic.in) ah district/ khua leh FPS hrang hranga buhfai dinhmun an en thei bawk a ni. Ration Card leh Aadhaar thlunzawm hna chu tun dinhmun ah 48.08% zawh tawh a ni a. FPS te computerise (automate) turin a nodal department ICT Department chuan ruahmanna siam in hma a la mek a; FPS tin a cashless facility (pawisa note hming lova thil lei leh hralh theihna) siam turin FCS&CA Department chuan hma a la mek bawk. March ni 1, 2016 atang khan NFSA 2013 chu kalpui a ni a; tun dinhmun ah NFSA 2013 leh NFSA beneficiary ni lo belhkhawmin Mizoram ah Ration Card 2,65,247 leh beneficiary 12,80,777 an awm a. Heng zingah hian NFSA beneficiary chu 6,67,788 (Ration Card 1,42,713) an ni. Meeting-ah hian Open Market Sales Scheme (Domestic) hnuaia State Sorkar in buhfai a lei theih nan te, India hmarchhak state dangte nen khaikhin a Mizoram a NFSA in a huam zat a tlem thu te, kudam mamawhna leh harsatna dang te Minister of State hnenah hian thlen a ni. 

Vawiin meeting-ah hian FCS&CA Secretary, Director leh officer dangte an tel a. FCI atang in Executive Director (North East), Regional Director, General Manager leh Manager dangte telin, Bureau of Indian Standards (BIS), NER leh Legal Metrology, NER te an tel bawk a ni.