2020/2026-2027

Aizawl dated 1st September 2026: Vawiin khan UD&PA Auditorium, Directorate of UD&PA, MINECO-ah, Swachha Bharat Mission 2.0 hnuaia Mizoram puma faina leh thianghlimna kawnga School inelna tur ‘Mizoram Green Schools League’ hawnna hun neih a ni a. Urban Development & Poverty Alleviation Department Minister Pu K.Sapdanga chu khuallian niin Dr. Vanlalthlana, Minister, School Education Department chu khual zahawm a ni a. Pu K.Lalthawmmawia, IAS, Commissioner & Secretary, School Education Department chuan hun a kaihruai a ni.

Khuallian Pu K.Sapdanga chuan UD&PA Department leh School Education Department tangkawpa buatsaih,‘Mizoram Green Schools League’ kalpui tan tura tlangzarh a ni chu lawmawm a tih thu a sawi a. School naupangten faina leh thianghlimna an ngainat a, an puitlin thleng pawha an ni tin nunphunga fai duhna an nunpui tlat theihna tur inzirtirna tha tak a nih thu a sawi a. He inelna hian lawmman sum fai engemaw zah a ken tel chu thil lawmawm tak a nih rualin, lawmman dik tak zawk erawh chu school hrang hranga zirlaiten fai duhna thinlung an pu tur hi a ni, a ti.

UD&PA Minister chuan hmasawnna leh changkanna tehfung pawimawh berte zing ami chu faina leh thianghlimna a nih thu a sawi a. School zirlai naupangteah fai duhna thinglung tuh nghet a, an School, an chhungkua leh khawtlang vawn faina kawnga hmahruaitu ni thei tura chher hi ‘Mizoram Green Schools League’ in a tum a nih thu Pu K.Sapdanga chuan a sawi a. Kan ram hi kan tu leh fate, chhuan thar lo la awm zel turte tan a luah tlak, fai leh thianghlim taka enkawl hi mi tin mawhphurna lian tak a nih thu sawiin, he mawhphurhna hlenchhuak tur hian naupang atanga puitling thlengin chanzo pawimawh tak kan nei a ni, a ti.

Khual zahawm Dr. Vanlalthlana, School Education Department Minister chuan, tunlai hian faina kawngah mizo thlalaite an thangharh nasa hlea a hriat thu sawiin, mahni thu a mimal leh thianho tangruala hmun tawp leh bal lai deuhte tifaia an che chhuak hriat tur a awm fo thin, tih a sawi a. Faina kawnga mizo thalaite hmalak thinna chu fakawm a tih thu sawiin, rel lo luh hnu pawh hian fai kan ngainatna hi khualzinte tana zirtlak leh entawntlak tura kan chhawm nun zel a pawimawh thu a sawi a. Mizoram Green School League hlawhtlinna tur hian School Education Department chuan theihtawp a chhuah tur thu sawiin, Faina kawngah Zirtirtute leh School-a thawktu zawng zawngte chu zirlai naupangte tana entawntlaka an awm a pawimawh thu a sawi bawk a ni.

Vawiin ‘Mizoram Green Schools League’ hawnna hunah hian Pu V.Lalsangliana, IAS, Commissioner & Secretary, UD & PA Department chuan Swachha Bharat Mission 2.0 hnuaia faina kawnga Mizoram puma School inelna buatsaih a nih chhan sawiin, Pu Jacob Lalawmpuia, State Mission Director SBM(U) & Director, UD&PA chuan inelna kalpui a nih dan tur sawi fiahna a nei a. Pi Angela Zothanpuii, Director, School Education Department chuan lawmthu sawina hun a hmang a ni.

Mizoram Green Schools League hi Block Level, District Level leh State Level-a kalpui tur a ni a. State Level-a lawmman pakhatna hian Cheng 1,00,000, pahnihna hian Cheng 70,000 leh pathumna hian Cheng 50,000 a kengtel a. District Level-a pakhatna hian Cheng 10,000, pahnihna hian Cheng 7,000 leh pathumna hian Cheng 5,000 a kengtel bawk a ni. Block level-a School titha 5 thlanchhuahte hi District Level-ah endik leh an ni ang a. District Level-ah hian a thazual 3 thlanchhuah an ni leh ang a. State Level-a inel turin District tin atangin a titha ber an tel dawn a ni. Ruahman dan chuan, School fai inelna endik hi October ni 12 atanga kalpui tan tur niin December ni 18 thleng awh tura tih a ni. He hmalaknain a tumte chu School zirlaite hnenah bawlhhlawh thliar hran zirtirte, vawi khat hman plastic hmang lo tura inzirtirte, zirlaite ni tin nuna fai duhna seng luh tirte, fai tura hmalakna hrang hranga hruaitu ni tura zirtirte a ni.