4468/2024-2025

Aizawl, February ni 28, 2025: District Beautification Competition atana district pakua te'n ruahmanna an siam theuh te UD&PA Minister Pu K. Sapdanga leh a endiktu MZU a Department of Planning & Architecture atanga mithiam sawm te hmaah vawiin khan UD&PA Directorate ah powerpoint presentation an pe.

UD&PA Minister chuan district khawpui fai leh cheimawi kawnga hmalakna pakhat atana he Beautification Competition hi buatsaih a nih thu sawiin, district hotute leh UD&PA thawktute chu he competition atan leh hmalakna dang hrang hrang atan theihtawp chhuah turin a chah a ni.

He inelna hi Municipal Corporation/Council la nei lo district pakua - Siaha, Champhai, Kolasib, Serchhip, Lawngtlai, Mamit, Hnahthial, Saitual leh Khawzawl tana buatsaih a ni a. District tinte hian an district theuh cheimawi dan tur ruahmanna - detailed project report siam in, hengte hi thehlut in vawiin hian endiktute hmaah sawifiahna hun an nei a ni. On site inspection, a hmuna enfiahna March ni 3-13 chhung neiin March ni 21, 2025-ah lawmman semna hun neih a ni ang.

He inelnaah hian a titha district pathum ten lawmman Rs. 50,00,000 theuh an dawng anga, district dang tel zawng zawng hnenah Rs. 2,00,000 theuh pek an ni bawk ang.