4871/2025-2026 

Aizawl 17th March, 2026 : Vawiin chhun dar khan Open Gym, MINECO ah Urban Development & Poverty Alleviation Minister Pu K. Sapdanga'n Swachh Bharat Kosh (SBK) Trust kaltlanga lei bawlhlawh paih motor 12 a vai liam.

He hunah hian Minister Pu K. Sapdanga chuan thu sawiin Swachh Bharat Kosh (SBK) Trust chu sawrkar laipuiin kum 2014-ah a din tih tarlangin, Swachh Bharat Mission hlawhtlinna tura duan a ni a ti a, he Trust hi company lian leh bank ten Corporate Social Responsibility (CSR) kaltlang leh mimal thahnem ngai ten faina leh thianghlimna kawng a sum an rawn thawh ve theihna tura tura duan a nih thu a sawi a ni.

Minister chuan Swachh Bharat Kosh Trust hnuaia sum hmuhte hi faina leh thianghlimna kawnga hmasawnna atan te, bawlhhlawh sawngbawlna hmun mumal leh tha zawk siam nan te, vantlang inthiarna sak nan te, Awareness Campaign bakah faina lama hna thawktute thiamna tih punna tura training leh workshop neih nan te hman thin a nih thu a sawi a.

Swachh Bharat Kosh Trust hian Swachh Bharat Mission hmalakna hi sawrkar tihhlawhtlin tur bik a ni mai lova, mitin mawhphurhna a nih zawk zia a tarlang a ni a ti a. Faina leh thianghlimna kawnga thawk chhuak kher lo tan pawh a sum fai ang zawnga an chet chhuah ve theihna niin, heng thawhhona avang hian India ram pawhin Faina leh thianghlimna piahlamah, bawlhhlawh sawngbawlna thlengin hma a sawn nasa hle tih a sawi bawk.

Swachh Bharat Kosh Trust hnuaiah hian Rs. 1.68 crore (Cheng Nuai za sawmrukpariat) dawn a ni a, hemi hmang hian bawlhhlawh phur lirthei 12 lei niin - Farkawn, Kawrthah, Ngopa, Phullen, W. Phaileng, Saitual, Mamit, Khawzawl, Hnahthial, Lengpui, N.Vanlaiphai leh SSO Office, Aizawl te pek an ni a, registration tih fel sa vek niin document pawimawhte pawh hlan nghal an ni a, heng truck-ah hian PA set (aurinna) leh GPS Tracker dah vek a ni.

Heng Garbage Truck bakah hian a chunga tarlan khaw 12 a Sanitation Workers te hman turin Rain Coat - 2, Gloves (kutkawr) - pair 14, Mask – 12, Gumboot - pair 4, hunter boot - pair 2, kekawr - 6, Cap (lukhum) - 2, T-shirt - 4 leh kawrlum - 2 theuh pek an ni bawk.

Swachh Bharat Kosh hnuaia bawlhhlawh paih motor vailiam puala inkhawm hi Pu CC Lalchhuangkima, Addl. Secretary, UD&PA Department & Chief Executive Officer, Aizawl Smart City Ltd.  chuan a kaihruai a. Pu Jacob Lalawmpuia, Director, UD&PA Department chuan Report a pe a ni.