Vawiin chawhma khan Millenium Centre Roof Top-ah UD&PA Minister Pu Zodintluanga chuan ni li (4) awh tur DAY-NULM (Deendayal Antyodaya Yojana-National Urban Livelihoods Mission) Mela a hawng a. Urban Development and Poverty Alleviation (UD&PA) Department buatsaih niin Skill Training Provider Eternity Partners LLP nen an tangkawp a ni.
UD&PA Minister Pu Zodintluanga chuan DAY-NULM chu mi harsa zawkte chawikanna leh retheihna umbona tura hmalakna a nih thu sawiin a hnuaia programme hrang hrang hmang tangkaitute tana Mela buatsaih a nih thu a sawi a. DAY-NULM Mela chu mahni kutchhuak leh thiamthilte phochhuah theihna hun tha tak a ni tiin hmasawnna tam tak a thlen ngei ka beisei a ni, a ti a. DAY-NULM beneficiary ten an thiam thil an phochhuah bakah Skill programme beneficiary ten massage leh beauty parlour an hawng chu lawmawm a tih thu a sawi a. Kan ram leh hnam intodelhna kawngah thalaite an pawimawh hle a ni tiin NULM programme-a zirlai (trainees) te chu taihmakna, rinawmna leh insumtheihna nena zir turin a chah a. District hrang hrang atanga NULM hamthatna dawngtu Self Help Group member-te, Skill Training chhuak tawhte leh Loan latu hlawhtling tak tak DAY-NULM Mela-ah hian an kalkhawm thu a tarlang a. DAY-NULM hmalaknate tihlawhtling tur chuan mipui kan pawimawh thu sawiin theihtawp chhuah a, hmalam pan theuh turin kalkhawmte chu a fuih bawk a ni.
DAY-NULM hi Sawrkar laipuia Ministry of Housing and Urban Affairs hnuaia programme pawimawh tak, khawpuia mi harsa zawkte tanpuina turin September Ni 24, 2013 khan bul tan a ni a. Mizoramah chuan UD&PA-in Mission hi an kalpui a, District khawpui 8-ah leh Census town thlanchhuah bik 7-ah hmalak mek a ni.
DAY-NULM hnuaiah hian component hrang hrang awmin chung zingah chuan Social Mobilisation & Institutional Development (SM&ID) hnuaia SHG (Self Help Group) 57 te leh Employment through Skill Training and Placement (EST&P) hnuaia thiam thil zir chhuak mi 6 leh Self-Employment Programme (SEP) hnuaia loan la mi 7 eizawnna din tawhten an thiam thil an phochhuak a. Aizawl, Kolasib, Lunglei, Serchhip, Mamit leh Lawngtlai atanga kalkhawm an ni a. Mela-ah hian Mission kalpuina atana thawktu Skill Training Provider leh Resource Organization ten Stall neiin DAY-NULM hnuaia hmalaknate mipui hrilhhriatna an nei nghal dawn a. Mela-ah hian Stall 77 a awm a ni.
Hawnna programme hi UD&PA Director Pu Joseph H Lalramsanga chuan kaihruaiin DAY-NULM Project Director Pu HVL Zarzoenga atangin technical report ngaihthlak a ni a. DAY-NULM Mela hi vawikhat buatsaihna a ni a. Stall awmte chu – Beauty & Wellness- Thai Massage & Facial, Mizo puan tah , handloom leh handicraft, pickle, pangpar, thlai, thawmhnaw hrang hrang leh a dangte an ni a. Security Guard duty leh Hospitality Duty te hi EST&P hnuaia training mek an ni.
