631/2026-2027

Dated Aizawl, the 21st May, 2026 : Vawiin khan UD&PA minister Pu K. Sapdanga chuan Hlimen ah Aizawl Smart City Limited hnuaia sak Hlimen Football khelmual (Playground) a hawng a, he khelmual hi ₹ 10.65 crore seng a sak a ni.

Hawnna inkhawmah hian khuallian Pu K. Sapdanga chuan thu sawiin, India ram pumpuiah mizote chu football khel thiama hriat kan ni a, ISL leh I-league ah te pawh player chhuanawm tak tak kan nei chu ṭha a tih thu a sawi a, he kan hmingthatna hi chhawm nun a nih zel theihna turin khelmual hawn thar pawh hian kawng ro tam tak a sut kuak ngei a beisei thu sawiin, field nuam satliah lo, ṭhalai tam tak football lam a mi chhuanawm chher chhuaktu a lo nih a, hriselna kawngahte, mahni invawnna kawngahte Hlimen khawtlang tan pawh malsawma thlen theitu a nih ngei a beisei thu a tarlang bawk a ni. Local Council hruaitute pawh neitu nihna pek an nih angin a hlutna hria a, uluk taka enkawl zui turin a chah a, zan lam thleng pawha inkhelh theihna tur field an nei thei ta chu hmasawnna ropui tak Mizoram tan pawh a nih thu a sawi tel bawk a ni.

Bialtu MLA Pi Baryl Vanneihsangi pawhin thu sawiin, Hlimen khawtlang tan ni chhinchhiah tlak tak a nih thu leh, khelmual hawn thar chu ṭhalaite tan eizawnna ngialnghet siam saktu a nih ngei a beisei thu a sawi bawk a ni.

Pu CC. Lalchhuangkima, Chief Exexutive Officer, Aizawl Smart City Limited hnen aṭangin technical report ngaihthlak a ni a. Khelmual sak thar hi Lalhming Infrastructure and Construction Pvt Ltd. te sak niin, ₹10.65 crore senga sak zawh a ni a, 25th April, 2022 atanga bul tan niin, 28th February, 2026 a sak zawh a ni a, khelmual zau zawng hi a dung 100 metre ni in, a vang lam hi 50 metre a ni a, mi 696 tan thutna a awm bawk a ni. Khelmual hmang duh tan darkar khatah Rs 1200 in a book theih a, Nikhat (Daily) ah - Rs 7000 niin, zan lama hmang duh te tan darkar khatah Rs 2500 chawi in a hman theih bawk a ni. Pu Chhuangkima hian Hlimen Veng Local Council hruaitu te hnenah neitu nihna leh a enkawltu nihna a hlan nghal bawk a ni.

Khelmual hawnna inkhawm hi Pu RC. Lalroliana, Chairman, Field Mangement Committee chuan lawmthu sawina in a khar a ni.