2217/2026-2027

Aizawl, 15.09.2026: Urban Development & Poverty Alleviation Minister Pu K. Sapdanga’n City Livelihood Action Plan (C-LAP) chu vawiin chawhnu khan a pisa ah a tlangzarh. Khawpui hmasawn zela eizawnna leh nitin khawsak chungchanga harsatna lo awm thin hmachhawn dan tur ruahmanna fel tak siam chu C-LAP in a tum ber a ni a. He plan hi UD&PA Department leh Pachhunga University College Economics Department te’n thawhhona thuthlung an ziah anga buatsaih a ni a.

Minister Pu K. Sapdanga chuan khawpui hmasawnna tur hrang hrang ngaihtuaha hmalak a nih rualin khawsak harsa zawkte, dinhmun in a zir loh avanga innghahna tlak eizawnna mumal neilote hmakhua ngaihtuah chu a ngaihpawimawh thu leh, UD&PA Department hminga chuang sa leh a hnathawh ber a nih thu a sawi a. “Poverty Alleviation”, mi khawsak harsate khaichhuah hna atana tangkai em em tur City Livelihood Action Plan buatsaih a ni chu lawmawm tiin, a buatsaihtu PUC Economics Department Research Team-te chungah lawmthu a sawi bawk. Minister chuan vawiina tlangzarh tak C-LAP a data tangkai tak tak tur a chuan thu sawiin, department tan pawh documentation tha a neih belh phahna zel a ni a ti.

Vawiin C-LAP tlangzarhna hun tawi buatsaihah hian UD&PA Director Pu Jacob Lalawmpuia chuan kaihruaiin, Sorkar laipuia Ministry of Housing and Urban Affairs (MoHUA) in buatsaih tura ruahmanna a siam anga buatsaih a nih thu sawiin, hemi atana PUC Economics Department-te nen MoU ziaka hma an la ho thei chu lawmawm a ti a. Department hmalakna atan chuah ni lo, zirlai research ti duhte tan pawha data pawimawh tak a nih tel tur thu a sawi bawk.

Dr. K. Vanlalhruaitluanga, Research Associate, C-LAP chuan project buatsaih dan report tlangpui a pe a. Meeting hmasa ber chu March ni 20, 2025 a neih niin, September ni 4, 2026 khan Final Report thehluh a ni. He zirchianna ah hian Census 2001 atanga 2011 data atanga mihring pun dan hisapin Aizawlah kum 2024 ah mi 4,06,228 awm anga chhut a ni a. Hemi zinga 72% vel chu hnathawk thei rual (kum 15-59) an ni. Mipui zawng zawng atang hian hna thawk thei, thawk mek leh thawh tur zawng mek belkhawm chu 50.60% a ni a. Hna thawh mumal tak nei chu 47.96% a chhut a ni. Heta tanga thawk lo zawng hi 2.63% an awm thung. Hna thawk thei lo naupang, kum upa, zirlai, ramtuileilo leh hna thawh tur zawng lo hrim hrim chu 49.40% in chhut a ni.

PLFS 2024 data hmanga chhut in Aizawl khawpuia hnathawh nei mek zingah hian 47% (60544) chu mahni hna thawk (self employed) an ni a. Mi hnuaia inhlawhfa (casual labour) hi 44% (56928) ni a chhut in, sorkar hnathawk emaw regular a hlawh la pangngai ang chu 9% (12080) an awm bawk a ni. Sorkar emaw Private company changtlung tak nilo a hnathawk, informal labour kan tih hi a tam zawk an ni. Eizawnna tenau MSME kan tih hi a thang ve bek bek bawk.

Retheihna avanga sorkar in a dawm kan mek zingah, AAY chhungkua mi 3729 awm in PHH hi chhungkaw 36,129 vel an awm bawk a ni. A mihring ang zawng chuan mi Nuai 1 chuang fe hi AAY leh PHH card hmanga buhfai la an awm a ni (heng hi ration card neih dan mil a chhut a ni ). Hna kanglang leh nghet lo thawktu (Informal workers) sorkar in a chhinchhiahna portal, E-Shram portal ah hian mi engemawzat an in ziaklut ve tawh a. Hetah hian insak leh cement hna lam khawih hi a tam ber niin mi 2500 vel an inziaklut tawh a, a dawtah lirthei a eizawng te an in ziaklut tam bawk a. Heng bakah hian awmpui hna thawktu te inziaklut bawk. He portal hi inhrilhriat a inziahluh that anih chuan sorkar tan pawh hmalakna ruahman a awl lehzual ang.

Vawiin C-LAP tlangzarhnaah hian UD&PA Department hotute leh PUC Economics Department a HoD leh C-LAP project research team te an tel a ni.