Lunglei District Level Committee on SAGY for MLAs chu vawiin khan UD&PA Minister Pu Zodintluanga kaihhruaina hnuaiah DRDA Conference Hall, Lunglei-ah an thukhawm a. Lunglei District MLA 7 ten SAGY hnuaia ‘Model Village’ tur an thlante tana ruahmanna siam hrang hrangte an thlirho a, Model Village tinte Charge Officer leh a kaihhnawih department-te hmalak dan tur an sawiho bawk.

UD&PA Minister Pu Zodintluanga chuan vawiina meeting-ah hian officials kalkhawmte chu sorkar hmalakna kalpui mekah theihtawp chhuahpui tur leh rawtna neite chuan a hnenah thlen hreh loh turin a chah a. Model Village thenkhatte chu Lunglei leh mamit District huamchhungah a tla ve ve avanga a bik takin Education leh Health department hmalaknaah harsatna awm thinte chu meeting-ah sawichhuah a ni a, heng hmunte hi Lunglei District Adminsitration zawk hnuaia awm tir dan ngaihtuah nise tih chu Minister hian a bawhzui tur thu a hrilh a. UD&PA department hnuaia khawpuia cheng In nei lote tana in sakna hna chu thawh mek a nih thu leh chhungkaw 500 tan sak zawh tawh thu a tarlang a; tun hnaiah In 150 sak lehna tur sorkar laipuiin a rawn phal sak thu leh mi tupawh kum 1-a cheng nuai 6 hlawh/thawhchhuah nei pha chin tan UD&PA kaltlangin Loan pek dan tur ruahman hnai a nih thu a sawi bawk.

SAGY for MLAs Scheme hnuaiah hian Lunglei District chhunga MLA 7 ten ‘Model Village’ tur atana an Bial theuha an thlan chu hetiang hi a ni : 1).Pu Zodintluanga-Marapara‘S’, 2).Pu PC Lalthanliana-Thiltlang, 3).Pu S.Laldingliana-Mualcheng‘S’, 4). Pu Joseph Lalhimpuia-Rotlang ‘E’, 5).Pu John Siamkunga-S.Vanlaiphai, 6).Pu NK Chakma-Kalapani leh 7).Pu Chalrosanga Ralte-Buarpui. Heng bakah hian A&C Minister Pu R.Romawia chuan ‘Model Village’ atan Lunglei District chhunga khaw pakhat Zotuithiang-Hnahchang athlang bawk a ni.

Heng Model Village hmasawnna tur atan hian sorkarin a hranpain sum a bituk lova, sorkar project/programme/scheme kalpui mek laite chak zawk leh a tha thei ang bera kalpui tum a ni thung a. Khaw mipuite mamawh azirin sorkar chuan heng hmalakna hrang hrangte hi a kalpui mek a ni : 100 % registration of births & deaths, 100 % literacy & school enrolment, 100 % vaccination, BPL chhungkua tihtlem, construction of water tank & Rain Water Harvesting, sanitation & cleanliness, Individual Household Latrines(IHHL), street light & drainage system, reduction of jhum, open defecation free area, COTPA & reduction of polythene/plastic usage, solar enrgy, agriculture link roads, community sanitary complex, solid & liquid waste management te a ni.