No.3954/2021-2022
Aizawl 10.2.2022: Vawiin khan Union Defence Minister Pu Rajnath Singh hovin Sainik Board of Governors virtual meeting neih a ni a. Chief Minister Pu Zoramthanga leh Education Minister Pu Lalchhandama Ralte pawhin CM office atangin an chhim a ni.

Chief Minister Pu Zoramthanga chuan he meeting-ah hian Mizo zirlai tam takin Sainik School an chhawr tangkai thu leh, lian zawka he institution hi a țhan chhoh zel a duhsak thu a sawi a. National Defence Academy leh Naval Academy a luh tum leh duhte buatsaihna tha tak Mizoramin a nei chu lawmawm tiin, discipline inzirtir kawngah te leh co-curricular activities tha tak tak kalpui a ni thin chu lawmawm a tih thu a sawi.

Vawiin Board of Governors' meeting-ah hian thu ngaihtuah tur hrang hrang chhawpchhuahte sawiho a ni a. Chung zingah chuan Sainik School din belh leh School dinna tur ram neih belh chungchang te, Board of Governors member tihpun leh adangte a tel a. An thurel hrang hrang chu state tin ten an ngaihdan leh sawi belh duh an neih chuan ni sawm ral hma in ziaka sawrkar laipuia thlen turin member-te an inhrilh a ni.

Mizorama Sainik School, Chhingchhip hi kum 2017 April ni 21 khan din a ni a. National Defence Academy leh Naval Academy ah an luh theihna tura mipa naupangte buatsaih chu a tum ber a ni a. Kum 2018-19 academic year atan hmeichhe zirlai admit țan niin, ram chhung Sainik School zinga hmeichhia te tan admission pe hmasa ber a ni.

Sainik School inrelbawlna hi autonomous body hnuaia enkawl niin, Defence Minister kaihhruai Board of Governors chu a enkawltu rorel sang ber a ni a. Chief Minister leh Education Minister te member zingah an tel a. Local Board of Administration awm lehin anni hian School hmalak zel dan turah ruahmanna siam turin hunbi neiin an inhmukhawm țhin a ni.

Attachment

  • Loading attachment...