6/2023-2024

Aizawl, 1st April, 2023 : Sawrkar laipuia Ministry of Home Affairs changtu Pu Amit Shah chuan vawiin khan lehlangin Aizawl a rawn tlawh. Union Home Minister hi chawhnu dar 1:00 khan BSF thawhtheihna in Lengpui Airport ah a rawn tum a, Transport Minister Pu TJ Lalnuntluanga leh official pawimawh ten lo hmuakin, hemi hnu hian BSF helicopterin Thuampui Helipad a pan nghal a ni. Thuampui helipad-ah hian Chief Minister Pu Zoramthanga, Home Minister Pu Lalchamliana, Chief Secretary Dr Renu Sharma, DGP Pu Devesh Chandra Srivastva leh official dangten lo dawngsawngin AR Ground panpui nghal a ni a. AR Ground-ah hian Deputy Chief Minister Pu Tawnluia leh official pawimawh ten an lo hmuak a, hemi hnu hian vantlang inkhawm neih chhunzawm a ni.

Pu Amit Shah hian AR Ground atang hian virtual-in Mizoram chhunga project hrang hrang 5 hawngin project dang 6 bultanna tur lungphum a phum bawk a, chungte chu

Project hawnte :
1. Assam Rifles Batallion Headquarters, Zokhawsang – cheng vbc 163.237
2. Lianchhiari Run (A Multi-Facility Centre), Aizawl – cheng vbc 10
3. Integrated Command & Control Centre (ICCC), Aizawl – cheng vbc 119.2
4. Cooperative Warehouse, Bairabi – cheng vbc 2.74
5. Impounding Dam and Development of Recreation Centre, Keilungliah, Champhai – cheng vbc 19.88
Heng a hnuaia tarlante sakna/siamna tur lungphum a phum bawk :
1. Laldenga Cultural Centre, AR Ground – cheng vbc 193
2. Zorinpui – Longmasu NH-502 laihna tur – cheng vbc 781.85
3. Aizawl Bypass (package-I) NH-6 laihna tur – cheng vbc 329.70
4. Construction of Aizawl Bypass (package-III) NH-6 laihna tur – cheng vbc 720.72
5. West Phaileng to Marpara Road siam thatna tur – cheng vbc 71
6. Warehouse/Commercial Centre, Aizawl sakna tur – cheng vbc 2.70

Pu Amit Shah chuan thawisawi chhunzawm nghalin tun kum-10 kalta chhunga Mizoramin hmasawnna hrang hrang a neih te chu fakawm a ti a. Hmarchhak states-te hmasawnna turin India sawrkarin nasa taka hma a lak mek thu tarlangin vawiina hawn leh lungphum phum tak project hrang hrang te ngei pawh hian Mizoram tan hmasawnna lian tak a thlen dawn a ni a ti. Union Home Minister chuan hmarchhak states-ah hel pawl tlem an la awm thu tarlangin, heng helpawl te pawh an ralthuam te dah tha a, nunphung pangngai zawh tura mipui sawrkar (democracy) a tel turin a sawm nghal a ni. Mizoramin leilung hausakna a neih hrang hrang te haihchhuah a nih theih nan central sawrkar in theihtawp a chhuah zel thu sawiin, PM-DevINE kaltlangin hmasawnna atan sum tamtak pek a ni tawh a ni a ti. Ni zung chakna(solar energy), mau leh tourism-te chu Mizoram hmasawnna tura tangkai ni a a hriat thu sawiin hemi kawngah hian tan lak thar a tul thu a sawi bawk a ni.

Chief Minister Pu Zoramthanga pawhin thu sawiin,Union Home Minister ngeiin Assam Riffles Headquarters thar a hawng chu a lawmawm takzet a ni a ti a; mizo mipuite tan ni chhinchhiah tlak tak a nih thu sawiin, Laldenga Cultural Centre sak tur pawh mipuite tan thil lawmawm tak a ni a ti a. Laldenga Cultural Centre ah hian mipui 10000 an len theih dawn thu a tarlang a, programe lian leh functions pawimawh neih nan a tangkai tak a nih tur thu a sawi bawk a ni.

Pu H.Lalengmawia, Secretary & Commissioner, chuan vawiin AR Ground a programme hmanna a kalkhawmte hnena lawmthu sawina hun a hmang a ni.