Tukin khan Union Home Minister Pu Rajnath Singh chuan Raj Bhawan a a thlenna room ah Chief Minister Pu Lal Thanhawla chu lengah a sawm a, tukthuan ei dunin India politics leh Mizoram politics te chipchiar takin an sawi dun.
Thi hrang hrang an sawinaah Chief Minister Pu Lal Thanhawla chuan Hindi pawimawhzia te sawi langin Hindi zirtirna leh tihlarna (propagation) tihchak a tul thu te, hemi atana Hindi Directorate hrang hial siam a duh thu leh sum indaih lohna avanga la tih theih loh a nih thu te a sawi a. Chutih laiin CSS hnuaia Hindi zirtirtu 1000 chuang te tihtawp tum mekna chu Hindi tihchak nana a pawi theih thu a sawi a. Home Minister Pu Rajnath Singh chuan Chief Minister in Hindi a dah pawimawh chu lawmawm a tih thu sawiin Hindi Directorate chu amah pawhin a ngaihpawimawh thil a ni, a ti a. CCS hnuaia Hindi zirtirtu 1000 rual te chu an hna an chhunzawm ang tiin Chief Minister a hrilh a, theihtawp chhuaha hma lak a tum thu pawh Chief Minister a hrilh bawk a. Ram hruaitu pahnih te hian Burma nena inlaichinna chungchang te pawh an sawi dun a, he thil tihchak nana hmalakna pawimawh nia an hriat te pawh an sawi dun a ni.
Chief Minister hian hmasawnna kawng hrang hrangah Mizoram ngaihpawimawh a tul thu Union Home Minister a hrilh tel bawk a ni.
