2491/2022-2023
Dimapur, 31st October, 2022 : India hmarchhak State hrang hranga Geology and Mining Minister-te intawhkhawmna hmasa ber (1st Northeast Geology & Mining Ministers’ Conclave) chu vawiin ah Niathu Resort, 7th Mile, Chumoukedima, Dimapur, Nagaland-ah neih a ni a. He intawhkhawmna hi Commerce & Industries (Geology & Mining) Department, Government of Mizoram huaihawt niin Nagaland Sawrkar hian an thleng thung a ni.

He Conclave ah hian Dr R. Lalthangliana, Minister, Commerce & Industries (Geology & Mining) Department, chu Convener leh Chairman niin, Union Minister of Mines, Coal & Parliamentary Affairs Pu Pralhad Joshi chu khuallian a ni a. Nagaland Chief Minister Pu Neiphiu Rio leh Assam Chief Minister Dr Himanta Biswa Sarma te chu khualzahawm an ni a, hmarchhak state hrang hranga Geology & Mining Minister-te leh Department hotu pawimawhte an tel a ni.

Conclave hi session hnihah then a ni a, chawhma lamah Convener Dr R. Lalthangliana kaihhruaina hnuaiah hmarchhak state hrang hrang Geology & Mining Minister te an inhmukhawm a, chawhnu lama Union Minister awm huna thu thlen tur agenda te sawi ho a ni. Hmarchhak state 8 atanga official ten an thu ken te sawi hawngin sawiho zui a ni a, hmarchhak state ten harsatna leh mamawh thuhmun an neih te lachhuakin chawhnu hunah hian Ministry hotute hnenah thlen a ni.

Chawhnu lam session hi Union Minister of Mines, Coal & Parliamentary Affairs Pu Pralhad Joshi hova hman a ni a. He hun hi Dr R. Lalthangliana, Convener chuan kaihruaiin thu a sawi bawk a ni.

Dr R. Lalthangliana chuan kalkhawmte hma ah hian NE Mines Ministers’ Forum siam hi a vei thin thu leh nikum September thla a ‘Exploration & Production (E&P) Investment Opportunities in North Eastern Region Meet,’ Guwahati-a neih kha remchanga la in hma an la chho ta tih a sawi a, thla kalta a ‘National Mines Ministers’ Conference’ Gachibowli, Hyderabad-a neih ah Union Minister of Mines, Coal & Parliamentary Affairs – Shri Pralhad Joshiji hnena ‘NE Geology & Mining Ministers’ Conclave’ rawn telpui tura a sawmna a rawn tihhlawhtlin avanga lawmthu sawiin, Nagaland Mines Minister-in thleng tura an sawmna a pawm chu lawmawm a tih thu a sawi bawk.

Dr Thangtea chuan India ram hmun dang nen khaikhinin hmarchhak state Geology & Mining Department te chu a hnufum bakah kawng tam taka midang tluk tura hmalak a la ngaih thu a sawi a, Mining Legislations mumal tak neih a tul thute, thawktu indaih lohna phuhruk a ngaih thute leh an kut zala tla hna pawimawh chi hrang hrangte tha taka an thawh theih nana budgetary allocation awmze nei zawk an mamawh thute a sawi a ni. Minor Minerals Concession Rules kalpui a nih bakah quality tha neih nan ‘Star Rating of Mines/Quarries’ a tul thute bakah hmarchhaka leilung hausakna laihchhuah chungchanga hmalakna tur pawimawh chi hrang hrang a tarlang a, DoNER/NEC funding pattern pawh Geological and Mineral Development a tel ve theih nana siam that a tul thute sawiin Union Minister leh Ministry of Mines hnuaia official-te chu hmarchhak state te dinhmun dik tak hriatthiam saka, harsatna te sutkian a nih theih nan leh hmarchhak hmasawnna atana kawng awlsam zawk dap sak ngei turin a ngen bawk a ni.

Chawhnu sessionah hian khuallian Union Minister of Mines, Coal & Parliamentary Affairs Pu Pralhad Joshi leh khualzahawm pahnih Nagaland Chief Minister Pu Neiphiu Rio leh Assam Chief Minister Dr Himanta Biswa Sarma te pawhin thu an sawi a, tlai lamah cultural evening neih a ni.

He hunah hian ONGC, OIL, NLCIL (Neyveli Lignite Corporation Limited), CIL (Coal India Limited) te an tel bawk. Mizoram atangin Pi Esther Lalruatkimi, Principal Secretary; Pu Lalthazuala, Director, Geology & Mining; Pu H. Lalbiakkima, Joint Director, Geology & Mining leh Pu Lalremmawia, Deputy Controller of Mines te an tel a ni.