Housing &Urban Poverty Alleviation leh Culture Ministry changtu Union Minister Pi Kumari Selja chuan vawiin chawhma dar 11 khan cheng nuai 639.85 senga sak Mini Sports Complex, Chite a hawng.

Pi Kumari Selja chuan Mini Sports Complex tha taka sak zawh a ni chu lawmawm a tih thu sawiin Mizoram mipui, a bik takin thalai ten an ngaihhlut a rin thu leh tangkai taka an hman a beisei thu a sawi a. Astroturf phah itawm hle a a hriat thu tarlangin tunlai chhuak thar ber ber infiamna hmanrua hmanga Sports Complex hi thuam a nih theih nan 10 % lump sum scheme nei ve tho Sports Ministry lam te pawh ngaihven tha a tih thu a sawi a, infiamna lama tui tak tak, talent nei tha thalai tam tak awmna Mizoram hian hetiang ang Sports Complex tha hi a mamawh hle a ni, a ti. Pi Selja-i chuan a Ministry chuan hmarchhak bial state te a ngaihpawimawh thu sawiin training a ni emaw, capacity building a ni emaw Mizoramin mamawhna a nei a nih phawt chuan theihtawp chhuaha tanpui zel a tiam a. Culture Ministry hnuaiah pawh Scheme hrang hrang State tan leh mimal tan a awm thu tarlangin Mizoram mipui te pawhin an hman tangkai ve ngei a beisei thu a tarlang bawk. Pi Kumari Selja hian Culture Ministry hnuaiah Mizoram tan Amphitheatre a sak sak dawn tih Mini Sports Complex hawnna inkhawmah hian a puang nghal a ni.

Mizoram Chief Minister Pu Lal Thanhawla pawhin thu sawiin Sports Complex Mizoramin a neih hmasak ber hawn a ni ta hi Mizoram Sports tan ni hlimawm a ni, a ti a. Mizoram thalaiten infiamna lamah hmabak eng tak an nei tih hriain Pi Selja-in he Stadium sakna tur sum MoHUPA kaltlanga Mizoram mipui a pe chu lawmawm a tih thu a sawi a. Sports Minister Pu Zodintluanga kaihhruaina chak tak avangin infiamna lamah State in hma a sawn a, Football-ah phei chuan National Team leh India ram Club tha ber berah Mizo infiammi engemawzatin an khel mek a ni, a ti bawk. Chief Minister chuan Conclave on Urban Poverty Alleviation for North Eastern States and Sikkim hlawhtlinga taka neih zawh tak chungchangah Union Minister leh amah tawiawmtu Official te chungah lawmthu sawiin Mizoram tlawh fo turin a sawm nghal a ni.

February, 2006 a sak tan Mini Sports Complex, Chite hi Housing &Urban Poverty Alleviation Ministry (MoHUPA) sum hmanga sak a ni a, July 2010 khan peihfel a ni. Indoor Games khelhna tur Pavilion Building 1 leh infiamna tualzawl (Football Playground) 1 a nei a. Playground hi 110m x 46 m a zau niin entu mipui 5000 thut theihna tur Gallery in a hual a ni. Indoor Games khelhna tur Pavilion Building hi chhawng thum (3 storeyed) niin a chhawng hnuai ber (Ground Floor)-ah Gymnasium, Dining Hall, Players te inthlakna room (2 nos.), Store Room, VIP Gallery leh Toilet te a awm a; 1^st Floor-ah Office, Media box paruk (6 nos.), Store Room 4 leh Toilet a awm a; 2^nd Floor-ah dawr (commercial shops) 10 awmin building chung zawl (terrace) ah Parking Area tha tak siam a ni bawk.

Hawnna inkhawm hi UD&PA Secretary Pu R.L. Rinawma\'n a kaihruai a. Minister Pu Zodintluanga, Minister Pu Nihar Kanti Chakma, Lok Sabha MP Pu CL Ruala, Law Commission Chairman Pu R. Lalrinawma, MLA te Col. Z.S. Zuala, Pu K. Lalrinthanga leh Pu K Liantlinga te bakah AMC Chairman Pu CT Zakhuma leh mipawimawh dang engemawzat an tel a ni.