India budget siam tura inpuahchahna kal mekah vawiin khan Union Minister of Finance Pi Nirmala Sitharaman hovin state leh UT tin hruaitute leh an aiawh ten video conference an nei a. Mizoram Chief Minister pawh a tel ve a ni. 

Chief Minister Pu Zoramthanga chuan Finance Minister hnenah hian COVID-19 hrileng avanga sum harsatna state in a tawh thu leh, India hmarchhak state te chu tlawhpawh harsa zawk hmuna awm an nih hlawm avanga hmasawnna tur sum, development fund hrang hrangah pawh ngaihpawimawh ngai an nih thu a sawi a. Hrileng avangin sawrkar laipui a chhiah lut a lo tlem in, chumi chuan state tin ten sawrkar laipui atanga an sum chan ve tur pawh a tlem phah avanga state te tan hmasawnna hna thawk tur chuan thui tak Externally Aided Projects ah an innghah a ngaih thu a sawi a. Hemi atan hian EAP sum hmuh te state in a lo do let ve na tur (state share) chu 10% ah tihhniam leh ni se tiin Finance Minister hnenah hian a thlen a. Chief Minister chuan Fifteenth Finance Commission in kum 2020-21 chhunga state-te hnena special grants ( ₹6,764 crores) pek ni se tia rawtna a lo siam, Finance Ministry in a lo hnawl tawh chu ngaihtuah that leh ni se tiin a thlen bawk a ni. 

Vawiin meeting-ah hian Chief Minister hi Finance Commissioner Pu Vanlalchhuanga'n a tawiawm a ni.