Vawiin khan Union Minister of State for Culture Dr. Mahesh Sharma chuan Archaeological Survey of India (ASI) Aizawl Circle chu Tuikhuahtlangah a hawng. He hun hi Mizoram Governor Lt. Gen. Nirbhay Sharma, PVSM, UYSM, AVSM, VSM (Rtd.) chuan hmanpuiin, Art & Culture Minister Pu R. Romawia chu khualzahawm a ni.

Union Minister of State for Culture Dr. Mahesh Sharma chuan hnam ziarang leh hun kal tawha thlahtute nun lo hman dante hi hnam rohlu a nih thu sawiin, heng hnam rohlu te hi ram leh hnam chakna pakhat a tih loh theihloh a ni, a ti a. ASI chuan hemi kawngah hian hun kal tawh thil kan hriat lohte hrechiang tura nasa taka ram pum a hma a lak thi  thu sawiin, ASI Aizawl Circle hawn thar chuan nasa lehzualin hemi kawnga India hmarchhak state te tan hmasawnna a thlen ngei a beisei thu a sawi a. Sorkar laipuiin India hmarchhak state-te tan kawng hrang hrangah hmasawnna chak zawk a thlen theih nan hma a lak zel thu a tarlang bawk. Union Minister of State chuan kum 2022-ah India in zalenna a sualchhuah atanga kum 75-na a hman tur thu leh, chumu hunah hi chuan ram zalenna sualchhuaktuten an lo mitthlak thin ang tak ram ralmuang leh fai, retheihna in a tihbuai tawh loh, dikna in ro a relna ram, hnam leh hnam inkar inthliarna awm lohna siam a nih ngei theih nan khua leh tui zawng zawng hma la turin a sawm bawk a ni.

Governor Lt. General (Rtd) Nirbhay Sharma chuan ASI Aizawl Circle hawn chu Mizoram tan thu lawmawm tak a nih thu a sawi a. Mizo zingah pipute atanga inhlanchhawn hnam ziarang leh zemawi nghet tak a awm laiin hun kal tawh lama an nun hman dan leh inrelbawl dan chiang zawk a hre tur chuan an kalsan thil hlui te laihchhuah emaw zawnchhuah a zirchian a ngai a ni, a ti a, Vangchhia leh hmun danga hmanlai hun sulhnu hmuhchhuah te chu a zirchian a ngaihhlut nachang hriat pawimawh a tih thu a sawi. Ram hmasawn tak tak tur chuan a theihna zawng zawng a hmang tur a ni a, ram 'history' kan chian loh chuan kan theihna dik tak haichhuah theih a ni thinlo a ni, tiin Governor chuan ram leh hnam history hriatchian lehzual a humhim kawngah thalai te an pawimawh thu a sawi bawk. Governor chuan ram hmasawn turin mipui an tanrual a, mimal tinin an theihna theuhvah thahnemngai taka thawk turin leh, thil engkimah sorkar tihsak nghak lova kan theihna leh thiamna kan hman thin a pawimawh a ni, a ti.

Art & Culture Minister Pu R. Romawia pawhin thu sawiin, Mizoramah kum 1894-a Welsh Missionary ten Mizo hawrawp an siamchhuah hma kha chuan Mizo history ziak a chhinchhiah a awmloh avangin, tun huna tih tak taka kan pipute sulhnu kan zawn chuan kan history tihausa sawt thei tur hmuhchhuah belh tam tak kan nei ngei dawn a ni, a ti a; ASI Aizawl Circle hawn a ni chu Mizoram tan ni chhinchhiah tlak tak a nih thu a sawi.

ASI Aizawl Circle hi Guwahati Circle atanga indang niin, India hmarchhak state pathum - Mizoram, Manipur leh Tripura a tuam dawn a. Superintending Archaeologist in a thutchilh tur a ruahman a ni. Vawiin office hawnna inkhawmah hian Pu P. Rohmingthanga, IAS (Rtd), Convener, INTACH Mizoram Chapter, Dr. M. Nambirajan, Regional Director, ASI, Pu Rakesh Singh Lal, Add. Director General, ASI leh Dr. Sujeet, Asst. Superintending Archaeologist ten thu an sawi tel a ni.

Mizorama ASI in tunhnaia hma an lo lak tawhna hrang hrang preliminary report an siam chu vawiin hian tlangzarh niin, Tripura, Manipur leh Mizorama ASI in thilhlui an laihchhuah leh hun kal tawh sulhnu an hmuh tharte pholanna photo exhibition buatsaih a ni bawk.

 

 

Attachment

  • Loading attachment...