No.4125/2021-2022 

Aizawl, the 26^thFebruary 2020 :  Zan hnih riak tura vawiina Mizoram lo thleng Union Minister of State for Health & Family Welfare Dr. Bharati Pravin Pawar chuan tlai lam khan Hmarchhaka nursing leh paramedical sciences zirna hmunpui, Ministry of Health & Family Welfare hnuaia awm RIPANS chu a tlawh a. RIPANS tih changtlunna tur Ministry in cheng vaibelchhe 480 vel an ruahman hnuaia hmalakna thenkhata hmun a en bawk a ni.

RIPANS ah hian Dr. Bharati Pravin Pawar hi Director leh staff ten lo dawngsawngin RIPANS chanchin tlangpui leh RIPANS tihchangtlunna hnuaia hmalakna thlen chin te chu Director, RIPANS, Dr. H. Lalrinmawia’n power point presentation in hrilhfiah a ni. 

Inkawm hun tawite neih zuiah, Union Minister of State for Health & Family Welfare chuan khawvel pumpuia medical leh a kaihhnawih mithiamte an indaih lo nasat thu sawiin COVID-19 hrilengin he indaih lohna hi a tizual tiin a sawi a. India chu ram thang chak pawl tak niin medical leh a kaihhnawih zirna lamah khawvel el pha turin Sawrkarin ruahmanna siamin a buaipui mek tih a sawi. RIPANS tihchangtlunna project chu Hmarchhak tan thil tha tak a nih a beisei thu sawiin RIPANS kal zelna turah duhsakna a hlan a ni. 

Minister tawiawmtu, Health & Family Welfare Board, Vice Chairman leh Covid-19 Medical Operational Team Chairman Pu ZR Thiamsanga chuan Minister chu lo lawmin Mizoram hriselna dinhmun tlangpui a hrilh a ni. 

RIPANS tihchangtlunna tur project ah hian khum 100 leng damdawi in sak te, Hostel leh Academic Block sak te, Master Course engemaw zat hawn te a tel a ni.