2222/2026-2027

Saitual the 15th September, 2026: Vawiin khan Union Minister of State for Youth Affairs & Sports Pi Raksha Nikhil Khadse chuan Saitual District tlawhin, Sawrkar deparment hotute leh Sports Association aiawh te nen inkawmhona hun an hmang.

He hunah hian Pi Raksha Nikhil Khadse chuan thu sawiin, sawrkar department hotute chu tualchhung mi an nih angin tualchhung mite tana tan la leh zual turin a fuih a, central scheme hrang hrangte mipuiin an hlawkpui lehzual theih nan chak leh zual a hma la turin a chah a ni. Mizoram chu organic farming-ah a san thu sawiin, mumal taka thlai leh thei tharte chu sawngbawl hna (food processing) kalpui a nih theih chuan ram dangah hlep tam leh zuala an thawnchhuah theih a beisei.

Chawhma lama Mizoram Sports Minister Pu Lalnghinglova Hmar nen an inkawm thu sawiin, Union Minister chuan naupangten school an kal laia an theihnate hai chhuah a nih theih nan infiamna lama inrelbawlna, (sports infrastructure) tihhmasawn a tul a ni, a ti. Mizoramin ruihhlo tawlhruk avanga kan buaina chu Pi Raksha Nikhil Khadse hian a vei thu sawiin, thalaiten ruihhlo lama harsatna an tawh loh nan sawrkar program 'Mera Yuva Bharat' kaltlangin thalaiten ruihhlo do kawngah ke pen se a duh thu a sawi bawk a ni.

Pi Raksha Nikhil Khadse chuan review meeting minutes hi Prime Minister Office a thlen thin avangin sawrkar official-te chu ngai pawimawh a, data lakkhawm leh meeting inpuahchah kawngah tan la thar turin a chah bawk a ni.

Vawiin thutkhawmah hian Saitual Bawrhsap Pu Srinivas Sadi chuan a Saitual District chungchang a sawi zau a, Sawrkar department hrang hrangte hmalakna leh hlawhtlinnate powerpoint presentation hmangin a tarlang a ni. Saitual SP Pu Vivek Kumar Maurya pawhin thu sawiin, kum kalta chhunga an ruihhlo man zat te a tarlang a, Saitual District chu state leh ram dang border an nih avangin ruihhlo tawlhruk an man nasat thu a sawi.

Vawiin thutkhawm hi Saitual Bawrhsap Pu Srinivas Sadi chuan a kaihruai a, Saitual District Head of Office-te bakah District chhunga Sports Association aiawhte kalin sports lama an mamawhte thlenin, thalaite tana sawrkar laipui hmalakna hrang hrang avanga an lawmna te an tarlang. Pu Srinivas Sadi chuan tan an lakna tur hrang hrangte chu chhinchhiah a, hma an lo lak tur thu a sawi a, Pi Raksha Nikhil Khadse leh kalkhawmte chungah lawmthu sawiin hun a khar a ni.

Pi Raksha Nikhil Khadse hian naktuk lamah Saitual atangin biakhlatna (Video conferencing) hmangin Kolasib-a sawrkar hotute a kawm ang a, hemi zawhah hian Saitual District Hospital tlawh lehin, chumi zawhah chuan Aizawl lam a pan ang.