2223/2026-2027

Kolasib, 16th September, 2026: Vawiin khan Smt. Raksha Nikhil Khadse, Hon'ble Union Minister of State for Youth Affairs and Sports chuan ruahman lawk angin Kolasib rawn tlawh tur nimahse rokhawlhna a awm avangin a rawn kal thei ta lo va. Saitual atangin Video Conferencing (VC) hmangin DC Conference Hall, Kolasib-a awm District chhunga Head of Office (HoO) te leh tlawmngai pawl aiawhte nen 'Interactive Session' an hmang ta zawk a ni.

Kolasib DC Conference Hall-a thutkhawm hi Kolasib Bawrhsap Pu H. Dolianbuaia chuan a kaihruai a, District chhunga department hrang hrang hotu (Head of Office) te an tel kim hle.

He hunah hian Kolasib District chhunga department hrang hrang ten an department hmalakna leh hnathawh dante PowerPoint Presentation hmangin an sawifiah a. Union Minister hian zawhna a neihte chu department hotute hian an lo chhang nghal zel a ni.

Smt. Raksha Nikhil Khadse chuan Agriculture leh Horticulture lamah Kolasib District-in a ti tha chu fakawm a tih thu a sawi a. District chhungah infiamna (sports discipline) hrang hrang a than chhoh zel theih nan leh sports infrastructure te tihhmasawn a nih theih nan duhsakna a hlan bawk.

Union Minister chuan thalaite zingah infiamna lama hei aia chak zawka hma lak a nih theih nan MY Bharat, Kolasib te nen tanghova hmalak a tul thu leh hmalak theih dan turte a sawi lang bawk a ni.