360/2026-2027

Dated Aizawl, the 4th of May, 2026: Union Textiles Minister Pu Giriraj Singh chuan tukin dar 8 khan Zemabawk Sericulture Training Institute (STI) a tlawh a. Sericulture Minister Pu Lalthansanga’n Union Minister hi a tawiawm a ni.

Union Textiles Minister leh a thawhpuite hian Sericulture Training Institute hmunah Muga silk pangang khawina thing – Som tree phunna hun an hmang a. Pu Giriraj Singh bakah Sericulture Minister Pu Lalthansanga leh Central Silk Board (CSB) Member Secretary Pu P. Siva Kumar te pawhin Som tree hi an phun a ni.  Thing phunna hun an hman zawh hian Union Minister leh official dangte chuan STI campus-a silk siam chhuahna hmun Silk Reeling Factory chu an tlawh chhunzawm nghal a ni.

Vawiin vek hian STI Conference Hall-a programme buatsaihah Union Textiles Minister Pu Giriraj Singh leh amah tawiawmtute chuan silk pangang hmanga eizawngtu farmer-te leh puantahtute nen inkawmhona hun an hmang a. He hun hi Sericulture Secretary Pi Florence Zotluangpuii’n a kaihruai a ni.

Thu sawiin Pu Giriraj Singh chuan Mizorama khaw 211-a farmer-te  chu chibai a buk a; thu tha hrilh tur chauh ni lovin, anmahni nena inzawmna thuk zawk siam tura lo kal a ni tih a sawi. Minister chuan Mizoram chu hmarchhak state zawng zawng zingah silk chi 4 - Muga, Eri, Mulberry leh Tasar nei thei awm chhun an ni chu vannei a tih thu a sawi a. 'District 11-a farmer 6000 leh mimal 19,000 zet chuan silk hi an innghahna ber leh an eizawnna ber atan an hmang a ni', a ti. Union Textiles Minister chuan Mizoram khaw awm dan (climate) leh lei (soil) chu sericulture tan a tha em em tih sawiin,  Mizoram Sericulture pawhin tun hnaiah za zelah 5.5 - 6 vel zeta hmasawnna hmel an hmu chu lawmawm a tihzia a sawi a ni.

Union Textiles Minister chuan Mizorama muga silk pangang khawitute chu hmahruaitu - Muga leader-ah siam a tum tih sawiin, Mizoram tan Silk Samagra 2.0 hnuaiah  sum thahnem tak a sanction tawh thu a sawi a. Mizoram  chu cluster-ah inthen se a duh thu sawiin Pu Giriraj Singh chuan District 4 - Lunglei, Champhai, Saitual leh Siaha chu Muga District atan; District dang zawng chu silk variety dang khawi nan hmang se, a ti a.  Cluster siama hmalak hian farmer-te zingah hmasawnna chak zawka a thlen avangin cluster behchhana hma an la a nih chuan, Central Silk Board-in a tanpui dawn a ni, a ti. Minister Pu Giriraj Singh hian silk farmer ten hma an sawn theihna turin an inkarah inelna thianghlim buatsaih turin sawrkar thuneitute a chah a,  farmer-te tan tehfung hrang hrang siam tur leh a titha zualte tana lawmman siam sak turin a chah a. Silk hmanga puan tah leh puan thuia eizawngtute chu National Institute of Fashion Technology te nena thawhho dan zawn sak a tum thu Pu Giriraj Singh hian a sawi bawk.

Sericulture Minister Pu Lalthansanga pawhin sawrkar laipui scheme hrang hrang kaltlanga hmasawnna an hmuh thin avangin lawmthu a sawi a; amaherawhchu, Sericulture kaihhnawiah hmasawnna ruhrel - infrastructure din tur tam tak a la awm avangin Central Sawrkar puihna a ngen nghal bawk. Minister chuan Silk Samagra 2.0 hnuaiah Mizoramah Cocoon Processing Unit din a ni a; Mizoram farmer-te cocoon thar chhuah pawh state danga hralh chhuah a nih thu leh Mizoram State Flagship Programme - Bana Kaih hnuaiah Sericulture Department ngaih pawimawh a nih thu a sawi bawk.

Union Minister hi a PS Pu Yogendra Singh, IAS; APS Pu Jai Krishna; Ministry of Textiles hnuaia Textile Commissioner Pi Vrunda Manohar Desai, IRS; Central Silk Board(CSB) Member Secretary Pu P. Siva Kumar, IFS; Mizoram Sericulture Department Secretary Pi Florence Zotluangpuii, MCS; Sericulture Department Director Pu Lalrinawma te bakah official dang ten an tawiawm a ni.