Zan khat riaka Mizoram rawn tlawh Union Minister for Agriculture & Food Processing Industries Pu Sharad Pawar chuan tukin zing khan Central Agriculture University (CAU) hnuaia Colleges of Veterinary Sciences & Animal Husbandry, Selesih a tlawh a, University Auditorium thar a hawng nghal a ni. Union Minister hi Mizoram Agriculture Minister Pu H.Liansailova, AH&Vety. Minister Pu Nihar Kanti Chakma bakah Chief Secretary Pu Vanhela Pachuau leh sorkar officials pawimawh dangten an tawiawm a ni.

Central Agriculture University buatsaih Auditorium hawnna leh Union Minister lawmna inkhawm-ah Khuallian Pu Sharad Pawar chuan he hun duhawm tak a hmanpui theih avangin lawm thu a sawi a, Selesih-a University chu hmarchhak bial tan a chhenfakawm hle a, a hriat thu leh sorkar laipui chuan hmarchhak bial tan University dang pawh hawn belh a tum thu a sawi bawk. Mizoram leh hmarchhak state te tun aia hma an sawn theih nan a leilung vawnhim leh chei a, a mihring chengte chherhchhuah tur kawng hrang hrang a hmuh thu sawilangin Pu Pawar chuan technical leh thiamna neih bik (skilled workers) lamah tan lak chho zel a pawimawh a ni, a ti. Tunlai khawvela thil pawimawh tak pakhat chu loneituten thuthar (information) an neih zung zung theih nana ruahmanna felfai tak siam a tul a, an buh leh thlai hralhna kawngah pawh duhthlan theihna zau zawk an neih a pawimawh a ni, a ti. Sorkar laipuiin hmarchhak bial-ah nasa takin tan la chhovin tunah chuan horticulture pawh 70% in a thang lian a, hei hian mi tam tak tan eizawnna ngelnghet a siam sak a ni, a ti bawk. Hmarchhak state te chu thing leh mau ah an hausa em em a, hengte hi kan humhalh that chuan ram boruak sik leh sa nuam tak a siam reng thei dawn a ni, a ti.

Mizoram Agriculture Minister Pu H.Liansailova pawhin thu sawiin state sorkarin agriculture lamah nasa takin hma a la chho zel a, University-a mithiamte nen pawh a thawk hova Mizoram chu state intodelha siam turin tan i la zel ang u, a ti. AH&Vety. Minister Pu Nihar Kanti Chakma chuan Union Minister-in Mizoram a rawn tlawh chu Mizoram chauh ni lo hmarchhak bial pum tan malsawmna niin  rah duhawm tak a thlen ngei a beisei thu a sawi bawk.

Union Minister ruala lo zin Pu R.Gangadharan, Secretary, Vety. & Animal Husbandry, GOI chuan sorkar laipuiin ruahmanna tha tak tak a siamte chu hmarchhak state ten tun aia nasaa chhawr thiama bawhzui taimak tul a tih thu a sawilang.

Central Agriculture University Vice-Chancellor Prof.S.N.Puri chuan Khuallian leh kalkhawmte lawmna thu sawiin vawiin hi 'World Veterinary Day' a nih thu leh he Ni-a an University Auditorium thar hawnna chu Union Minister Pu Sharad Pawar-in a hmanpui avangin hun chhinchhiah tlak tak a ni, a ti. CAU, Selesih hi University naupang tak ni mahse rampum Agriculture University zingah 6-na dinhmun a hauhphak a ni tih a tarlang bawk.

Union Minister Pu Sharad Pawar hian vawiin chawhma dar 11:45 khan King Fisher flight in Mizoram a chhuahsan a. Airport ah hian Agriculture Minister Pu H. Liansailova leh AH&Vety Minister Pu Nihar Kanti Chakma te bakah Planning Board Member Secretary Pu P.L. Thanga te,  Pu T.V. Fambawl, Secretary Agriculture Department te leh Mizoram sorkar officer pawimawh ten an thlah liam a ni.