Vawiina UD&PA Minister Pu Zodintluanga hova UD&PA, PHED leh PWD hotu officer-te Joint Meeting, Secretariat Conference Hall-a neihah chuan Vaivakawn Junction (Bazar bul) rawt hniam leh zauh chungchanga hmalak dan tur rel a ni.

Minister Pu Zodintluanga chuan kawng siam tur hian Department hrang hrangte an tanrual a ngaih thu a sawi a. Hna hrang hrang thawk an nih dawn avangin intihbuai leh innekchepna awmlo thei ang bera thawk a, inpui tlang turin Department hotute chu a chah a ni. Vaivakawn kawng siam hi ruah tui han hnu, November thla vela tan tura ruahman a ni a.

Vaivakawn bazar bul kawng chho intanna lai chu metre thum vela rawt hniamin, kawng pawh metre 15 vela zau turin leh, footpath tha tak siam tura ruahmanna siam a ni a. Department hotute chuan kawng siam chhung hian mipui tana harsatna tlem thei ang bera thawhho an rel a ni.