Archaeological Survey of India (ASI)-in Mizo Pipute sulhnu zir chiang tura Vangchhia-a excavation work hna a kalpui mek chu Champhai Bawrhsap Pu Vanlalngaihsaka chuan tun Inrinni kalta (30.1.2016) khan a hmunah tlawhin a enpui a. “Archaeologist-ten lei hnuaiah eng thil te nge inphum tih zawngchhuak tura an laih rual hian hmasang kan Pipute hunlai atanga kan hnam chanchin kan la hriat kimloh, kan history ti changtlung thei tur inphum te chu hailan a ni dawn a ni” Bawrhsap chuan a ti a ni.

Dr. Sujeet, Asst. Superintending Archaeologist (ASI), Director Excavator (ASI), Camp Vangchhia, hovin tunah hian excavation hna hi January ni 5 atang khan bultan a ni a. Kawtchhuah Ropui thlen hma ramhnuai kar hmun engemaw zatah hmanlai huna mitthi phumna hmun te leh retaining wall an siam te hmuhchhuah niin, Dr. Sujeet chuan “water pavilion” tia hming a phuah, fur ruahtui tam laia tui luan dan awmze nei taka her kual tura lungchang ker kuak te chu ropui a tih thu a sawi a.

Dr. Sujeet chuan ASI in Vangchhia-a kutthlak a tum 10% bak hna thawh a la nih loh thu leh, hmabak la tam hle mahse tuna hmuh theih chin ringawt atang pawhin khatih hunlai ami te khan hetiang thil hrang hrang siam nachang an hria hi thil mak a ni, tiin a sawi. Champhai Bawrhsap hova Vangchhia tlawh naah hian lung ker dang hmuhchhuah thar nghe nghe a ni.

Vangchhia Kawtchhuah Ropui-a lung tun te chu eng tik lai hun a phun nge an nih tih leh a phuntute hre turin sample-te lak a zirchian a ni dawn a. Tunah hian India Hmarchhakah chuan ASI hian Vangchhia bakah Assam-a Dima Hasao District-a lung bel-a mitthi phumna hmun zirchiang turin hna an thawk mek bawk.