1824/2024-2025
Champhai the 29th August, 2024: Champhai District huamchhunga khaw pali(4) - Ngur, New Champhai, Khuangthing leh Leisenzo Village Council By- Election inthlan neih tur chungchanga hriat tur pawimawh sawihoin vawiin khan Champhai District Bawrhsap hovin DC Conference Hall, Keifangtlangah thutkhawm neih a ni.
Champhai District Bawrhsap Pu VL Remliana chuan State Election Commission-in August ni 27, 2024-a thuchhuah a siam angin Village Council By-Election neih tur a ni a, Champhai District huam chhung khaw pali(4) Ngur, Leisenzo- New Champhai leh Khuangthing te tan ni September ni 24 2024 hian Village Council By-Election buatsaih a ni dawn tih a tarlang a. Champhai District chhungah inthlan tluang taka neih anih theih nan inpuahchahna kalpui mek zel niin inthlan a mawhphurhna hrang hrang nei tura ruat te pawh training uluk taka neih pui an nih thu a sawi a. Village Council By-Election inthlan muanawm leh felfai tak neih anih theih nan political party-te chu thawhpuiah sawmin sawrkarin inkaihhruaina a siam te tha taka zawm tlang turin a ngen bawk a ni. Harsatna an neih emaw zawh fiah duh an neih te Election office ah te thlen vat thin turin a chah bawk.
He hunah hian Pu Ngulzathuama, Election Officer chuan political party leh candidate - te zawm tur Model Code of Conduct leh State Election Commission thuchhuah Village Council By-Election chhunga inkaihhruaina sawi zauna hun a hmang bawk.
He hunah hian Addl DC Pu K. Zorammuana leh election kaihhnawih official-te, tlawmngai pawl leh party hrang hrang aiawhte an tel a ni.
