Vawiin dar 10:00 AM khan Aizawl VC member 263 te chu ration buhfai, gas, khawnvartui, chini leh mipui nitin mamawh thildang semchhuah dan felfai zawk a lo awm theih nan Vanapa Hall ah training pek an ni a. Training hi Supply Minister Pu H.Rohluna leh FCS&CA Secretary leh Director ni bawk Pu K.Riachho,IAS ten an hman pui.

Mipui mamawh thil leh ei leh bar semchhuah chungchangah  nasa taka  FCS&CA( supply department) an phungbawm thin avangin Minister chuan  VC member te hnenah lawmthu a sawi a. Buk lung diklo hmang leh teh tling lo te an awm chuan en liam mai lovin Supply Department emaw Legal Metrology Department  thuneitute hnenah thlen vat  thin a tul thu a sawi. Buk dik thlap a Public Distribution System(PDS( ration buhfai, chini, gas,etc)) kal tlanga thil sem reng reng chu pek chhuah tur a ni a, chu chu mipui chanvo leh a semtu mawhphurhna a nih thu a sawi. PDS tha taka kal pui tur chuan VC ten retailer te semchhuah zat tur leh an allotment order thlengin an hmuh ve zel a tul a ni a ti. Vigilance Committee pawh chak takin kal pui ni leh se, a awm tawh lohna hmunah te pawh thar thawh leh vek nghal  a tul thu a sawi. Vigilance committee ah hian NGO te leh prominent citizen te pawh tel ve thei se a that thu a sawi bawk.PDS diklova kalpui awm chuan department official an ni emaw contractor, retailer leh hnathawktu dang te pawh an phu tawkin sawrkarin a hrem tur thu a sawi. Retailer thenkhat ten buk tling lovin buhfai an dawng thin ti in  an sawi thin a, chu thu tling lo a nih thu leh Zuangtui godown(kudam) ah weight bridge(bukna) in dik takin  teh hmasak vek anih hnuah chauh buhfai hi an pek chhuah thin thu a sawi. Buhfai tih chingpen avangin department official then khat te pawh suspend  an nih thu a sawi a buk tlinglova sem chhuak te chungah pawh sawrkar in action  a lak zel tur thu a sawi bawk. BPL(vantlang hnuai lam) leh AAY( rethei zual te) hnena buhfai tlawm zawk a pek chhuah nan leh buhfai indaihlohna phuhruk nan sawrkar in thlatin cheng vaibelchhe 9 leh nuai 68  a seng ral ziah a ni a ti. Buhfai hi controlled item a nih loh avangin  sumdawng te paw'n hmundang atangin awlsam takin an lak luh theih thu a sawi a PDS buhfai dawrah hmuh tur a awm leh mai thin chu tih hauh loh tur a ni a hrem theih an nih sawi. Manipur ah harsatna a awm leh tawh avangin lirthei hmang zawng zawng te petrol pump sawrkar humhalh pui tur leh Manipur lama phurh thlak  tur a petrol zuar an hmuh chuan FCS&CA emaw legal metrology Official te pun vat thin tur in a chah. Minister chuan edible oil ( hriak) PDS kal tlang a semchhuah a nih theih nan sawrkar in hma a la mek a ni a ti.

FCS&CA Secretary  chuan  PDS chu fel fai zawka kan kal pui loh chuan thingtlang lo neiha kan thar chhuah chu tih fuh tum paw'n thla 3 ei bak a ni thin si lova ei leh bar kawngah harsatna lian zawk a awm thei dawn a ni a ti. FCS&CA Department chu department dang ang lo takin mi mal thawh that leh department tanlakna ringawt a a hlawhtlin theih loh chang a awm thin thu a sawi.Mizoram a buhfai semchhuah tur ah hian external factors - Mizoram pawn a kawngpui chhia, strike leh bandh te leh rail kawng chhia awm thin te chuan harsatna an siam thin thu a sawi a. Department official te thil tih dik loh leh a sem chhuaktu retailer te leh a phurtu ten an tih chingpen thin vangin harsatna a awm thin bawk a ni a ti. FCS&CA chuan PDS tha taka kal pui thei tur chuan khawtlang hruai tute leh mipui phungbawmna an mamawh thu a sawi. Buhfai leh gas a harsatna a awm thin chu sawrkar chuan pawi a tih thu a sawi a, harsatna ti zia awm turin sawrkarin theihtawp a chhuah reng a ni a ti.Kum 2001 chhiarpui tlawh chhanna buhfai hi sem chhuah a la nih avangin Mizoram pawnah pawh Mizoram ang bawkin harsatna a awm ve mek thu a sawi.Tunhnai kum 3 liamta  mai khan thingtlang khua te'n Cooking Gas an hmang deuh vek tawh a, mahse; Mizoram quota a pung tam hlei thei si lova Gas hnianghnar taka neih chu thil harsa a la nih rih  thu a sawi.Buhfai harsatna ti ziaawm turin kum 2007 atang khan market rate (manto) in quintal 80,000 kumtin lei ziah a nih thu a sawi a. Heng bakah hian indaihlohna ti ziaawm turin Officer te special permit pawh tih tawp lai lawk a nih thu a sawi. Buhfai man to zawk a Mizoram in lo lei tawh thin hi December thla ah chuan sawrkar hmalakna in a awm tawh loh beisei a ni a ti. VC te chu BPL thlan chungchangah fimkhur taka hnathawk turin a hrilh bawk.

He 'One Day Training  On PDS for members of Village council/Court' ah hian  Pu T. Lalrochunga, Addl. Director, FCS&CA, Pu Vanlalngaihsaka, Jt Director leh Pu Rokunga Ralte, Jt Director ten kalkhawm te hnenah  training pe in zawhna leh chhanna hun hawn a ni nghal.