Vigilance Awareness Week 2018 hman mek puala Essay inziahsiak buatsaiha tithate hnenah vawiin khan SAD Conference Hall, New Secretariat Complex-ah Chief Secretary Pu Arvind Ray ho in lawmman semna neih a ni. Essay thupui hi "Ka hmathlir - Eiruk awmlo Mizoram" tih a ni.
Chief Secretary chuan eirukna hlawhtling taka do tur chuan mihring ngaihdan leh rilru puthmang - dik leh diklo, tha leh thalo a thlir dan kaihruai theitu chhungkua, khawtlang leh kohhran an pawimawh leh mawhphurhna a san thu a sawi a. Corruption ziarang chu khawvel hmun hrang hrangah hmuh turin a awm tih chu phat theih rual nilo mahse mi zawng zawng an corrupt lo a, chutih rual chuan kan hnathawhna hmunah emaw khawi hmunah pawh ni se mi rinawm taka a nun tlat chuan eirukna kan buaipui hi a nep chho zel thei dawn a ni, a ti.
Pu Mukesh Kumar Meena, ACB Director pawhin corruption do tur chuan mipui an tanrual a pawimawh hmasak thu sawiin, rilru puthmang thlak danglam a, corrupt duhna emaw pawi tih lohna rilru pu lo tura inzirtir a tul a ni, a ti. Programme hi Pi Donnie, Deputy Secretary, Vigilance Department chuan kaihruaiin, essay inziahsiak lawmman hi Chief Secretary in a sem. Endiktute atangin leh lawmman dawngtute atangin thusawi ngaihthlak tel niin, Pi Lalmuanpuii, Under Secretary, Vigilance Department chuan lawmthu sawiin hun a khar a ni.
Essay inziahsiak lawmman pakhatna atanga pathumna dawngtute chuan trophy, pawisa leh certificate pek vek an ni a. Anni bakah hian mi panga hnenah "Promising Writer Award" pek ni bawkin, certificate leh pawisafai cheng 3,000 theuh an dawng a ni. Lawmman pakhatna dawngtu chu Pu Malsawmtluanga, Govt. Complex, Aizawl niin pawisafai cheng 30,000 a dawng tel a, pahnihna chu Pu C. Lalchhanhima, Bawngkawn South, Aizawl niin pawisafai cheng 20,000 a dawng a, lawmman pathumna chu Pu Vanlalmalsawma, R.S. Hostel, Ramrikawn chuan la in cheng 10,000 a dawng tel bawk. Promising Writers Award dawngtute chu KJ Lalbiakngheta, Tuikual North, Aizawl; Lungtiawii, East Phaileng; F. Vanlalrochana, Zotlang, Aizawl; T. Lalchhuangliana, Upper Republic, Aizawl leh Rosangzuala Ralte, Hunthar Veng, Aizawl te an ni.
