No.2499/2021-2022

Aizawl the 6th October 2021: Vawiin khan Tourism Minister Pu Robert Romawia Royte hovin a pisaah sawrkar mi pawimawhten kumina Virtual Anthurium Festival hman dan tur an rel.

Minister chuan Anthurium Festival chu kum tin ropui taka buatsaih thin ni mahse kum kalta atangin Mizoramah COVID19 hripui a len tak avang leh sawrkarin inkhuahkhrihna a kalpui chhoh tak zel avangin mipui nawlpui nen a huhova hman a rem ta lo, a ti a. Kuminah pawh virtual-in, tv leh internet kaltlangin he festival hi hman a ni leh dawn a ni, a ti.

Tourism tihhmasawnna turin Sawrkar Laipui chuan kum tin festival hmanna tur sum leh pai State te hnenah a pe thin a. Anthurium Festival pawh hi chutianga Sawrkar Laipui atanga sum hmuh hmanga buatsaih thin a ni. Hmasawnna hna thawh nan emaw, COVID19 do letna atana hman leh pawh pen theih a ni lo a. Tourism tihhmasawnna atan bik liau liau Sawrkar Laipui chuan State te hnenah sum a pe chhuak thin a ni.

Vawiin meeting chuan Covid Appropriate Behaviour (CAB) leh Sawrkar Inkaihhruaina dangte zawm chungin kumin Anthurium Festival chu Aizawl Vanapa Hall-ah October ni 28 leh 29 hian neih ni se, tiin a rel a. Cable TV leh social media platform hrang hrang - facebook, youtube leh a dangteah mipui thlir theih turin live in pek chhuah a ni ang. A hman dan tur kim chang duang turin vawiin meeting chuan Programme Committe a din nghal a. Virtual Anthurium Festival Programme Committee Chairman atan Tourism Secretary ruat niin Member Secretary atan Tourism Director chu ruat a ni bawk.