Vawiin chawhnu hian Lawngtlai District Election Officer Chamber-ah kan hma lawka MLA inthlanpui 2013 vote chhiar hun atana inbuatsaih dan en ho na thutkhawm District Election Officer Pu J Hmingthanmawia, MCS hovin neih a ni a, vote chhiar ni atana Officer pawimawh zual te an kal khawm.

Meeting-ah hian Election Commission of India in vote chhiarna hmun leh a chhehvel (Counting hall & Counting Centre) buatsaih dan tur a duante sawiho hmasa in chung thilte chu a nih dan tur ang thlapa buatsaih an ni em tih a hmunah enfiah nghal zel a ni a. Vote thlakna khawl (EVM)  chhawpchhuah lailawkna (Transit Storage) tur leh Sealing tihna turte pawh ruahmanna siam nghal a ni bawk.

Hei bakah hian Election Commission duh dan anga venhimna thuah thum (three tiers security) neih dan tur Superintendent of Police Pu B.K Singh, IPS ruahmanna siam pawh sawiho niin security mi leh sate hnathawh tur hrang hrangte pawh sawiho nghal a ni bawk.

Vote chhiarni hian District Election Office Complex (Counting Centre) chhungah phal sak bik lirthei pariat chauh an tlan lut thei dawn a, lirthei dang chu Main Gate pawnah dah vek tur a ni. Heng lirtheite vil tur hian Police engemawzat dah an ni ang. Gate chhunga lut tur, Election Duty Staff leh DEO Staff zawng zawng ten an Identity Card an tilang vek tur a ni a, theihnghilh palh leh engemaw avanga kenglo te ngaih hnathiam an ni lo vang. 

Election Commission of India duh dan angin Counting Centre chhungah hian Politician, Minister, MLA leh MDC nilaite leh Party mi leh sa reng reng luh tir phal an ni dawn lova, Candidate leh an Agents;  thuneituten ID Card an pekte chauh luhtir an ni dawn bawk a ni.

Tin, vote chhiar ni hian Lawngtlai khawpui chhungah Magistrate hovin Security party engemawzat zanlai dar sawm leh pahnih thleng an vei vak reng dawn a, inthlan emaw inthlan result kaihhnawih thil a buaina leh harsatnasiaman awm leh awmloh an vil reng dawn bawk a ni.

Lawngtlai District chhunga Constituency pathum a vote tla te hi Counting Hall pahnihah chhiar an ni dawn a, Counting Hall pakhat ah 37- Lawngtlai West Constituency vote te chhiar a ni anga, Counting Hall dangah 36- Tuichawng leh 38-Lawngtlai East a vote tla te chhiar an ni ang. Heng vote chhiarna tur Hall te hi tun dinhmunah peih fel tep an ni tawh a ni.

Vawiinah Meeting ah hian SP bial pathuma RO leh ARO bakah District Information Officer te an kal khawm a ni.