2569/2023-2024

Aizawl, 31.10.2023: Mizoram Legislative Assembly 2023 inthlanpui lo awm tur atana a tam thei ang berin vote an thlak nan vawiin khan SVEEP (Systematic Voters Education and Electoral Participation) Aizawl District chuan Millennium Centre, Aizawl kawtah SVEEP Concert a buatsaih a. Mipui kalkhawm vote nei te chuan vote thlak ngei tura intiamin an hming an sign bakah ram inrelbawlna atana vote hlutzia inhrilhriatna neih a ni.

He huna khuallian Aizawl DC, District Election Officer ni bawk chuan mipui kalkhawmte chu ram ropui siam tur chuan voter ten mahni chhia leh tha hriatna fim taka hmanga vote an thlak ngei a pawimawh thu a sawi a. Election Commission of India ruahmanna angin voter tam thei ang berin vote an thlak a, harsatna nei te tan pawh remchanna siam sak a home voting facility leh vote thlak ni a puih dan tur remchanna hrang hrang te siam a nih thu te a sawi a. Chuvang chuan taksa lama harsatna neilo leh thalai te tan ngat phei chuan ram siamtu pawimawh an nihzia hrechhuak thar a, ram hruaitu tura an duh chu thlang ngei turin a sawm a ni.

Vawiin SVEEP hmalakna hun buatsaih hi SVEEP Nodal Officer Pi C. Laltleipuii chuan a kaihruai a. General Observer leh Expenditure Observer te'n an telpui bawk. Zaithiam leh lam thiam hrang hrang te zaiin lam an entir a. Signature Campaign ah hian vote nei ten vote an thlak ngei tur intiamin an hming an ziak a. Voter te tana hriattur pawimawh inziahna pamphlet sem a ni a. SVEEP merchandise bakah Self help group te tan inphona stall buatsaih a ni bawk.