3618/2024-2025
Siaha the 2nd December 2024: Vawiin chawhnu Dar 1 khan DMS Hall, New Siaha-ah District AIDS Prevention & Control Committee (DAPCC) buatsaihin World AIDS Day hman a ni a, Pu VL Hruaizela Khiangte, DAPCC Chairman leh District Bawrhsap ni bawk chuan Khuallian niin he hun hi a hmanpui.
Khuallian Pu VL Hruaizela Khiangte chuan kalkhawmte chu chibai a buk a, HIV/AIDS chungchang inhrilhhriatna programme pawimawh tak buatsaih a ni chu lawmawm a tih thu a sawi. Bawrhsap chuan kumin World AIDS Day thupui chu ‘Take the rights path’ a ni tiin chu thupui ang tak chuan nitin nunah kawng dik thliar hrang a, zawh thin turin kalkhawmte a chah. AIDS natna inkaichhawn theih dan bakah a invenna leh a kaihhnawh Dan leh dun hriat a pawimawh hle a ti a, hriatchian tawk loh avangin kai an awm belh thin thu leh a kai tawh ten endawngna leh diriamna an tawk nasa hle a ni, a ti. HIV/AIDS chu natna chikhat, awlsam taka inkaichhawn theih a nih avangin fimkhur a ngai takzet a, HIV hrik kai tam tak chu inthlahdah vang leh fimkhur tawk loh vang ni mahse vanduai vanga kai tam tak an awm tiin an harsatna hriat thiam pui a, enkawlna tha pek a pawimawh thu a sawi. Hriat chian tawk loh avangin a hma chuan HIV hrik kai te chu an bula cheng ve thiangloa ngaiin an hlau hle thin a, tunah erawh thiamna sang zel avangin an dinhmun pawhin ziaawm lam a pan zel a, amaherawhchu tan lakna tur tam tak a la awm, a ti bawk. Vawiina kalkhawmte chu a kaichhawn theih dan hriaa, a tir atanga fimkhur nachang hre turin leh midang hrilhhretu ni theuh turin a sawm bawk.
Dr Lalnunziri, Sr CMO chuan vawiin hun hi kaihruaiin Pi Lalhriatpuii, Chief Judicial Magistrate, Siaha chuan HIV & AIDS (Prevention & Control) Act 2017 tih thupui hmangin zirtirna a pe a, Dr Lalrosanga, District Medical Superintendent, DHS chuan vote of thanks sawiin hun tih tawp a ni. Siaha District Hospital-a Nurse, Doctor leh thawktu zawng zawngte bakah Southern English Comprehensive school zirlaite an kalkhawm a ni. World AIDS Day hi Khawvel puma HIV darh zel tur leh he natna vei te tan endawngna leh thinhrikna a bo nan leh enkawlna tha an dawn theih nana December Ni 1 huaihawt thin a ni a, kuminah erawh Sunday a nih avangin vawiina hman a ni. Kumin World AIDS Day thupui chu ‘Take the Rights Path’ tih a ni.
