Pu Lal Thanzara Health & Family Welfare Minister, chuan Chanmari YMA Hall-a World Blood Donor Day neih chu a hmanpui. Thisen petute zahna leh chawimawina ni leh a chunga lawmthu sawina ni hi khawvel pumah 2004 atang khan hman tan a ni a, Mizoram ah chuan 2007 atang khan hman a ni. He ni puala inkhawm buatsaih hi State Blood Transfusion Council leh MSACS leh AVBD tangho buatsaih a ni.
Pu Lal Thanzara chuan kan hriat theuh angin khawvel pumpuiah natna a pung zel a, thiamna pawh a sang zel a, thisen mamawhna pawh a sang zel a. Damdawi leh Vitamin tha ber pawhin a tihdam theih loh natna tam tak hi mihring thisen hmang a tihdam theih a ni. Mi nunna/mihring nunna chhanchhuak turin Doctor hnih kher a ngailo - midang tana malsawmna nasa tak, an nunna hial kan chhan theihna chu - thil awlsam leh hlu tak si - Thisen pek hi a ni a ti. Minister chuan tun dinhmun-ah chuan Mizoramah Blood Bank 10 kan nei mek a, 8 hi District Hospital tin ah awmin 2 te hi Kohhran Damdawi In 2 Serkawn leh Durtlang ah te a awm a, heng hi sorkar in, bungrua, thawktu leh hmanrau nen a thuam vek bawk a, tunah hian changtlun zawk a Blood Bank neih sa te hi thuam that dan tur department miten an duang mek a, hmasawn zel a beisei thu a sawi.
State Blood Transfusion Council Meeting thu chhuak sawi langin Minister sorkar laipui lamin ti tura min phut angin thisen sawngbawlna (processing) senso hi thisen hmangtu apiang te hnen atanga lak tur a ni dawn a, hei hian mipuite min barakhaih lo sela, Health Care Scheme tha tak leh sorkar hnathawkte tan Medical Reimbursement ah hemi man hi bill vek theih a ni dawn tho va, chuvangin kan ipte atanga senso hi a pung dawn chuang lova, chutih laiin thawktu indaih lo leh thisen vawn that leh a sawngbawlna lama kan indaih lohna min phuhru zawk ang a, a mamawhtute tan thisen lamah hnianghnar zawkin kan awm phah theih dawn a ni. Amaherawhchu Health Care Scheme hnuaia in ziak lut velo Private Hospital a damlo awmte tan erawh a buaithlak thung ang.
Kumin a World Blood Donor Day atana thupui thlan chu Safe Blood for saving mothers tih a ni a. Thingtlang leh hmun kilkhawr a Blood Bank awm lohna ah chuan nu nau nei ten thisen mamawhna avangin nun an chan fova, hemi tibo tur hian kan vaia thawhhona tha a pawimawh a ni.Vawiin ni hi thalaiten midangte tana malsawmna an nih theih nan an nun vawng thianghlim a thisen pe thei turin a chah a ni.
Inkhawm hi Pu R.L. Rinawma, IRS, Principal Secretary, Health & Family Welfare in a kaihruai a, Dr. K. Ropari, Principal Director, Health & Family Welfare, Dr. Lalmalsawmi Sailo, Project Director, MSACS leh Pu C. Lalnunnema, General Secretary, AVBD ten thusawina hun an hmang bawk.
Vawiin thisen petute Chawimawina Ni ah hian Pu Lalbiakthanga Pachuau, Senior Adviser, AVBD, Tv. Lalremruata vawi 54 thisen petu leh Pi Rebecca Saimawii vawi 35 thisen petute chawimawina hun hmang a ni a. Khuallian hian April 2013 - March, 2014 chhunga a thlawn a thisen petute pawl hrang hrang hnenah chawimawina No (Trophy) leh Thuziak (Citation) a hlan.
Educational Institution Category : 1) NSS, Pachhunga University College - 312 Unit ; 2) NSS, Govt. Hrangbana College - 187 Unit ; 3) NSS, Govt. Aizawl College - 178 Unit.
YMA Category : 1) Chanmari West Branch - 192 Unit ; 2) Ramthar Branch - 158 Unit ; 3) Ramhlun North Branch - 131 Unit.
Religious Category : Youth Evangelical Front, Kohhran Thianghlim - 325 Unit ; 2) TKP Aizawl Co-ordination - 224 Unit ; 3) General PYD Mizoram UPC - 127 Unit.
Miscellaneous Category : 1) Mizoram EPL Fans Club - 161 Unit ; Special Report FB Group - 61 Unit ; 2) Adventure Club Inter-College - 48 Unit.
1973 khan Aizawl Civil Hospital ah thisen pek tan a ni a, 1993 khan Voluntary in thisen pek tan a ni, 2013 chuan thisen mamawh zawng zawng chu voluntary in 93.13 % a lo ni ta a.Kumin 2013-2014 chhung khan Voluntary Blood Donation Camp hi 436 neih a ni a, Unit 20699 hmuh a ni.
