Vawiin chawhma dar 11:00 khan Lunglei Civil Hospital a, Doctors’ Seminar Hall-ah World Blood Donor’s Day Cum Voluntary blood donation camp hman a ni a. He hunah hian Pu S.Laldingliana, Parliamenatry Secretary, Health Department etc. chu khuallian niin, he ni pual hian mi tlawmngai thisen pe tam te chawimawina hun leh Voluntary blood donation camp huaihawt nghal a ni.

Parliamentary Secretary chuan Mizote hmai uanna leh hnamdang laka kan in chhuanna thin chu tlawmngaihna leh sakawlh leh ral laka khawtlang venhim theih te a ni thin a. Tunah chuan hun thar ah kan awm ta si a, thian chhan thih ngam, Mizo lanu leh valrual ten an tih theih thil ngaihsan awm ber zing ami chu Thisen peka nun chhan a ni a ti. YMA member te tan chuan thisen pek aia rawngbawlna ropui a awm lova. Kohhran thalai tan pawh thisen pe a nun chhan hi Kristian nun leh midang te hmangaihna lantirna ropui tak a ni a ti. Thisen pe tu tan a mawhphurhna lian tak a awm ve a chu chu thisen thianghlim pe chhuak thei a nun vawn uluk leh natna hrik thalo laka inven tlat hi a ni a ti bawk.

Vawiin Programe hi Dr.K.Lalsanga, Medical Superintendent leh AVBD, Lunglei chuan a kaihruai a. He hun ah hian Thisen vawi 43 pe tawh Pu Zosangzuala leh 40 pe tawh Pu H.Vanlalmuana te bakah 2011 June atanga kumin June thla inkar a thisen vawi 3 pe tawh te chawimawi a ni bawk.