Vawiin  kha  khawvel puma ri hriatna atana beng hriselna chungchang  inzirtirna ni, World Hearing Day a  ni a.  He hun hi Mizoramah chuan National Programme for Prevention and Control of Deafness (NPPCD) hmalaknain district thenkhatah te hman a ni.

World Hearing Day 2019 hi Health Department hnuai-a district 7, Aizawl East & West, Champhai, Mamit, Lunglei, Serchhip leh Kolasib-ah te hman a ni a. Heng district-ah te hian zingkarah Hospital Staff, ENT Department leh NPPCD thawktuten YMA, KTP, School naupangte nen  thawk hovin Rally an nei a. Chhun lamah  kumin atana thupui ni mek,  'Check your Hearing' 'I beng hriatna enfiah tir rawh' tih thupuia hmangin OPD tinah inzirtirna  neih a ni. Mithiam ten he hunah hian beng enkawl dan, bengngawnna laka kan fihlim theih dan tur te leh hemi kawnga thil pawimawh hrang hrangte sawiin zirtima an pe nghal zel a. Vawiin khan he ni pual hian khawl hmanga in entirna hrang hrangte a thlawn vekin a mamawh tute tan  tihsak a ni.

District hrang hrang atanga Report thehluh ang chuan vawiin World Hearing Day denchhena damlo in entir zawng zawngte hi he thu buatsaih lai hian mi 165 an ni a. Beng ri hriatna tha lo (hearing loss) mi 75 hmuh chhuah an ni.

NPPCD programme hi National Health Mission Programme hnuaia awm niin kum 2014 atang khan Mizoramah kalpui tan a ni a. Tunah hian Lawngtlai leh Siaha district tih lohvah chuan kalpui vek a ni tawh a. Heng hmunah te hian OPD tinah ENT Surgeon, Medical Officer, Audiologist, Audiometric Assistant te an duty vek a ni.

NPPCD hmalakna hnuaiah hian kum 2018-2019 inkar chhungin:                                                                                                                                                            

In entir zat : 23,000, Beng natna hmuhchhuah zat: 13000, Beng ri hriatna tha lo hmuh chhuah:3000, NIOH lama beng dar vuah tura  refer: 1000 leh Beng zai: 140 an awm tawh a, he programme kalpui tan anih kum 2014 atanga tun thleng hian beng ri hriatna tha lo mi 9400 hmuh chhuah an ni tawh a ni.