3939/2022-2023

Khawzawl, the 22nd March, 2023: World Water Day pualin tukin dar 6:00 khan Khawzawlah Street Rally neih niin, Vengthar Bazar atangin PHE Division Office thleng rally neih a ni a, he hunah hian mi 50 chuang an tel thei a ni.

Vawiin chawhma dar 11:00 khan Khawzawl Electric Br. YMA Hall-ah World Water Day pual hian hun hman leh a ni a. Er. Liantluanga Chohte, EE, PHED Khawzawl WATSAN Division, Khawzawl kaihhruaia hun hmanah hian khuallian District Bawrhsap Pu C.C. Lalchhuangkima chuan kum 1992 atanga World Water Day hman a nih chhan tlangpui a sawi a. Tui renchem thiam a pawimawh thu sawiin, tui thianghlim hnarte kan dima kan humhalh loh chuan a kang zel dawn a ni, a ti a. Mizoram hi kan vannei a, ruahtui kan dawn that ber kum 2017 ah kumtluanin 2253 mm vel kan dawng a, ruahtui tlak chhiat ber kum 2019 ah 2000 mm kan dawng leh a, a tlangpuiin Mizoramin ruahtui kan dawn hi 2000 mm a ni tlangpui a ni, a ti a. Tun atanga ngaihtuahna kan sen loh chuan kum khawpui dangten harsatna nasa tak an tawh ang hi kan tawk thei a, engtikah emaw chuan tui pump tur kan nei lo mai ang tih a hlauhawm hle a ni, a ti a. Tuilakna hnarte kan humhalh zel loh chuan tui lak tur neih loh hun a la awm thei dawn a, chuvangin World Water Day denchhen hian tui hna humhalh turin ramngaw humhalhnaah pawh theihtawp chhuah zel a pawimawh thu a sawi bawk.

Vawiin hun hmanah hian Pu K. Lalnunsanga, President, Sub-Headquarters YMA, Khawzawl pawhin thu sawiin tui hnate a kangchah lohna turin thing leh mau leh ramngawte humhalh a tul thu leh, tuihna humhalhna kawngah PHE Department leh YMA ten thawhhona tha tak an nei thin chu lawmawm a tih thu a sawi bawk.

World Water Day puala hun hmanah hian Govt. Khawzawl College zirlaite bakah YMA hruaitute leh sawm bikte an tel a. Er. Eliza Vanlalpeka, SDO, PHED Khawzawl in lawmthu sawiin hun hman a khar a ni.