Hnahthial Group YMA leh Joint YMA Hnahthial chu vawiin khan Central YMA President Pu Vanlalruata chuan thiah a nih thu leh YMA Sub-Headquarters Hnahthial hawn a nih thu puangin hruaitu atana ruatte a puang nghal a, Hnahthial District Bawrhsap Pu Vanlalmawia leh Superintendent of Police Pu Lalbiakkila ten an hmanpui a ni.

YMA Sub-Hqrs. Hnahthial hawnna inkhawm hi Community Hall, Electric veng, Hnahthial-ah neih a ni a, CYMA President Pu Vanlalruata chuan hawnna thu sawiin "Zofate kan vanneihna chu Pathian-in Missionary-te kaltlanga YMA min pe hi ani a, midang te tana malsawma leh tanpui ngaite tanpuitu a nih avang hian a tluchhe ngai lovang" tiin Khawi laiah emaw daisual palh changte lo awm mahse YMA hi a tlu tihna a nih loh thu CYMA President chuan sawiin "Kan nunphung hi danglam hret hret mahse YMA erawh a pangngai reng a, Zualko kal ngai lovin thlan laih pawh ngailo mahse YMA hi a tangkai lo tihna a ni lova a hlutna hi a sang zel a ni" ati bawk.

YMA chu amah ringawta kal thei a nih loh thu Pu Vanlalruata chuan sawiin "YMA-ah hotu a awm lova, hruaitute ten inpekna kan neih a ngaiin hruaitu kan nihna hriatchian tur a ni.  YMA hruaitu chu a dikin a huaisen tur a ni a, hun khirhkhan alo thlen pawhin tlanchhe lova, thutlukna dik siam ngam a nih a ngai" tiin tun dinhmunah C.YMA hnuaiah Branch-811, Group- 45, Sub-Hqrs.-8 a awm mek thu leh YMA member zawng zawng chu 446623 an nih thu a tarlang bawk a ni.

He hun hi Pu Fabian Lalfakawma, Treasurer, CYMA chuan kaihruaiin Pu R.Lalngheta, CEC chuan Pathian hnena inhlanna hunserh a hmang a, Pu C.Lalrotluanga, President, YMA Sub-Hqrs. Lunglei chuan fuihna thu a sawi bakah YMA Sub-Hqrs. Hnahthial President thar Pu B.Lalhmingliana chuan lawmthu a sawi bawk a ni.

YMA Sub-Hqrs. Hnahthial hawnna neih zawh hian an Office tur pawh Bazar veng Hnahthial-ah Central YMA President hian a hawng nghal a ni. YMA Sub-Hqrs. hawn thar Hnahthial tan hian CYMA chuan Rs.10000 leh thil pawimawh hrang hrang an pe a, YMA Sub-Hqrs. Lunglei chuan Rs.5000 leh thil pawimawh tak tak an pek bakah Tuiphai Group YMA chuan Rs.2000 an pe bawk a ni.