Mizoram Youth Commission buatsaih Youth Summit leh Road Show 2018 kharna chu vawiin chawhnu khan Convention Centre, Lunglei ah neih a ni. Mizoram Legislative Assembly, Deputy Speaker Pu R.Lalrinawma chuan khuallian ni in a hmanpui.

Youth Summit leh Road Show kharna  inkhawm hi Pi Julie Lalrinzami, Chief Judicial Magistrate Lunglei in kaihruai in Pu R.Lalrinawma chuan Youth Summit leh Road Show hi Mizoram tan thil thar a ni a, Sawrkar in Mizoram Youth Commission hmang in thalaite eizawnna bul tan nan leh hmasawnna tur a ngaihtuah hi a vanneihthlak hle a ni a ti. Sawrkar in thalaite tan zirna leh infiamna lam ah chak takin thalaite tan hma a la a, Incentive Cash Award thleng in a sem a. Thalaiten he remchanna hi tangkaipui thiam turin a chah a, ti tha peih lo te chu mi in ang rau rau ah pawh thiante hnuai ah in la awm ang a ti. Hmsawn zel tur chuan teirei peih a ngai a, kan khaw hawi te ti zau a hnamdangte kan kawmngeih thiam a pawimawh a ni. Tunlai thalaite zing ah hian ai a upa te zahna leh ngaihsak lohna a tam tawh in midangte harsatna siamtu ni lo turin leh Mizoram chu ram nuam tak a siamtu ni zawk turin a chah a ni. He Youth Summit leh Road Show hi hmsawn nan hmang theuh turin kalkhawm te a chah bawk a ni.

Dr.Vanlalramsanga, IES, Planning Secretary pawhin thu sawi in Youth Commission hmalakna vanneihpui turin a beisei a, hmasawn duhna rilru put tum turin thalaite a chah a, taihmakna, tumruhna leh hlawhchham duh lohna nei te chu an hlawhtling thin a ni a ti.

He Youth Summit leh Road Show ah hian Mizoram Sawrkar Department hrang hrang bak ah private firm ten stall 51 an hawng. Kharna inkhawm zawh ah hian zaithiam hrang hrang ten he Summit pual hian concert an nei nghal a ni.