Vawiin chawhnu dar 1 khan Zarkawt Branch YMA chuan an Recreation Centre-ah YMA Day leh Platinum Jubilee ropui takin lawmna an nei a, tah hian Pu Lal Thanhawla, Chief Minister chu khuallian a ni.

Pu Lal Thanhawla chuan YMA Platinum Jubilee lawmna atan 'Khawtlang nun siamthat' thupui a an hmang chu tha tiin, thupui ah hman anih chhan chu - a tul vang anih a rin thu a sawi a, Kristian 100 % inti ramah chuan HIV Aids te chuan min run ngamlo turah ngaih anih laiin, he hri vei tam tak kan awmte, Drugs chi hrang hrang lo hluar chho leh ta te chu khawtlang tangrualin kan beih a pawimawh a, chuta tan chuan sorkar lam pawhin tan a la chho zel a nih thu a sawi.

Zarkawt chu veng te tak te mah nise, sorkar hna ah leh politics bakah sumdawnna lamah mi hmingthang tak tak te lo chhuahna anih avangin mi pawhin an ngaihsan thin thu leh elrel em em te pawh an awm ve tho  thu sawiin, "miten kan thatna lam sawi lovin, that lohna lai an sawi uar anih pawhin keimahni hi inlungrual zelin, khawtlang nun siamthat kawngah leh harsa zawkte chawikan nan kan theihna te hmang ang u", tiin khawtlang mipui kalkhawmte chu a sawm.

Kan tu leh fate chu kan rohlu neih, vanram thleng pawha kan chhawm theih awmchhun te an nih thu sawiin, " kan hriat ngai loh (awmpuite) kutah kan tu leh fate nunna kan hnutchhiah a,  Rs. 100/- pawh an kuta kan dah ngamloh laiin, kan rohlu berte kan dah chhung chuan, tu leh fa tha kan nei ngai lovang", tih Pu Hawla chuan a sawi.

Zarkawt vengin YMA Day leh Platinum Jubilee lawmna an neih hi Branch YMA President, Pu Lalrochuanga chuan a kaihruai a, mi hmingtha te chawimawina hunah Pu Lal Thanhawla, International leh National Level a Chawimawina tam tak lo dawng tawh chu hlan a ni a, Pu Hawla hian, khawtlang tana inpe National Level leh State chhung a mite, Zirtirtu National Award dawngte  National leh International Level ah India ram aiawh a infiammite chawimawina a hlan ve thung a ni.